TLU SA is hoogs beswaard oor die feit dat sy voorsitter van die Wes-Streek, mnr. Wilhelm Rochér, ‘n naweek in die tronk moes deurbring en op aanklagte van moord moet teregstaan nadat hy sy lewe en eiendom moes beskerm teen misdadigers, sê sy president, mnr. Ben Marais.

Vrydagaand is inligting ontvang dat vee gesteel is.  Mnr. Rochér het saam met ander boere, die veediewe opgespoor en voorgekeer, en vasgestel dat twee beeste reeds opgekap in die diewe se voertuig was.  Die veediewe was gewapen en het op die boere begin skiet, nadat drie waarskuwingskote geskiet is.  Een van die waarskuwingskote was waarskynlik ‘n opslagkoeël, wat een van die diewe in die boud getref het, en oënskynlik wil dit voorkom of hy weens ‘n ander rede dood is as die skietwond.

Nietemin is mnr. Rochér gearresteer, asook een van die veediewe, en ‘n naweek lank aangehou.  Hy is Maandag op R5 000 borgtog vrygelaat.

Berigte in die media het reeds daarop gedui dat ‘n polisieverslag meld dat die dief wat geskiet is, sy hand agter sy rug gehou het, en dit gelyk het of hy ‘n wapen uit sy sak wou haal.  Indien hierdie bewering waar is, staaf dit die aanspraak van mnr. Rochér dat uit selfverdediging opgetree is, en die feit dat daar oor en weer geskiet is, dui daarop dat die misdadigers boonop gevaarlik was.  Om ‘n bekende en vooraanstaande boer dan toe te sluit, word gesien as ‘n doelbewuste poging om hom te verneder, nog voordat die ondersoek behoorlik afgehandel word.

Die feit dat boere self moes inspring om veediewe te gaan voorlê, nadat oor die afgelope maande reeds 95 beeste ter waarde van ongeveer R665 000 gesteel is, is ‘n klad op die polisie se naam, omdat hulle skynbaar nie die vermoë of die wil het om boere te help in hulle oorlewingstryd teen veediewe nie. Trouens, reeds so lank gelede as Augustus verlede jaar was daar ‘n ooreenkoms met die polisie aangegaan dat ‘n taakspan aangestel sal word om veediefstal te ondersoek in die Swartruggens omgewing.  “Dit het nie gebeur nie, met die gevolg dat hierdie gebeure toegeskryf kan word aan verbreekte beloftes, pligsversuim en die stelsel wat gefaal het,” sê mnr. Marais.  “Bowendien het TLU SA betroubare inligting wat daarop dui dat daar mense in die SAPD se distrikskantoor op Rustenburg, asook by die Landbank, werksaam is waarvan die familie by veediefstal betrokke is.  Dit vererger die situasie.”

TLU SA sal die verloop van die saak fyn dophou, en sal alle moontlike hulp aan mnr. Rochér verleen in hierdie saak, maar ook met ‘n moontlike verdere aksie teen die polisie as dit sou blyk dat hier onregmatig opgetree is, soos dit tans wil voorkom.