Klik hier en maak 'n bydrae tot die TLU SA Traumafonds
Maak 'n bydrae tot TLU SA Traumafonds: Klik hier
TLU SA dankbaar vir afstem van OSV-wysiging Dinsdag | 07 Desember | 2021

TLU SA is dankbaar dat die voorgestelde wysiging op Artikel 25 van Suid-Afrika se Grondwet ten opsigte van die onteiening van eiendom sonder vergoeding te verander, afgestem is.

Die Nasionale Vergadering het Dinsdagmiddag oor die wysiging van die Grondwet gestem om onteiening sonder vergoeding moontlik te maak. Die debat het om 14:00 begin en net voor 16:30 is stemme getel. ’n Totaal van 267 stemme was nodig vir ’n tweederde meerderheid, maar net 204 het ten gunste van die voorgestelde verandering gestem en 145 daarteen.

Ofskoon dit ’n goeie uitslag was, is dit egter beslis nie die einde van OSV nie.

“Die proses is beslis nie verby nie. Daar is dié wat vasbeslote is om dit op een of ander manier deur te voer. Ons as TLU SA is natuurlik dankbaar vir almal wat daarteen gestem het, maar ons kan nie nou terugsit en van die aangeleentheid vergeet nie,” het TLU SA se Hoofbestuurder, Mnr. Bennie van Zyl kort na die stemming gesê.

“Dit gaan beslis weer geopper word. En die gevaar vir ons land se ekonomie is dat al word daar net gepraat daaroor, veroorsaak dit wantroue en gevolglike skade. Beleggers raak al hoe versigtiger om te belê en ons ekonomie het dié vaste beleggings broodnodig. Hoe gouer die ANC van die standpunt afsien, hoe beter.

“Ek wil baie spesifiek vir die ad hoc-groep vir die beskerming van privaatbesitreg en al 53 organisasies wat hierby ingeskakel en hul rol gespeel het om die ware feite op die tafel te lê, bedank. Ons is wel baie realisties oor die pad vorentoe. Die saak is nie afgehandel nie en ons sal bedag wees vir enige pogings om ons ekonomie so omver te werp.”

Die onteieningswet is ook nog in proses en hiervoor is net volstrekte meerderheid nodig. Daar sal beslis weer pogings wees om dit deur te voer. Die rooiligte van gevaar flikker dus steeds.

 

Foto | Tierra Mallorca on Unsplash