G20 Farmers’ Dialogue

Die G20 Farmers’ Dialogue was ’n gefokusde landbougesprek wat op 17 September 2025 by die Fakulteit Landbouwetenskappe aan die Universiteit Stellenbosch gehou is. Dit is deur die Southern African Agri Initiative (Saai) aangebied, in vennootskap met organisasies soos TLU SA en AFASA, spesifiek vooraf die G20-beraad in Suid-Afrika.

Die doel was om boere se stem direk in die G20-proses in te bring. Boereleiers en boere-organisasies uit G20-lande en ander streke (Europa, Noord-Amerika, Asië en Afrika) het fisies en aanlyn deelgeneem, om oor vier kern temas te praat:

• Familieboerdery
  
• Digitalisering, innovasie en kunsmatige intelligensie
  
• Vee en proteïene
  
• Handel en voedselveiligheid

Die bydraes uit hierdie gesprek vorm die basis van ’n boere-verklaring/memorandum wat by die G20-staatshoofde-beraad in Johannesburg ingedra is, sodat wêreldleiers nie net regerings- en korporatiewe perspektiewe hoor nie, maar ook die “regte boere” se standpunte oor winsgewendheid, familieboerdery en voedselveiligheid.

TLU SA het aan twee van die besprekingspunte deelgeneem binne die geskeduleerde program naamlik Familieboerdery en Vee en Proteiene en ook aan die bespreking oor digitalisering, innovasie en KI deelgeneem.

Internasionale reaksie skerp ná Trump se uitlating oor Suid-Afrika

Die uitlatings van VSA-president Donald Trump op 26 November het die wêreld se aandag weer op Suid-Afrika gevestig, op ’n wyse wat die regering in ’n besonder swak lig plaas. Volgens Trump se openbare verklaring het die VSA besluit om nie die G20-vergadering in Suid-Afrika by te woon nie, en hy skryf dit direk toe aan die Suid-Afrikaanse regering se onvermoë en onwilligheid om kernkwessies soos menseregte, plaasveiligheid en grondonsekerheid aan te spreek.

Wat duidelik is, is dat wêreldrolspelers begin reageer op die gevolge van jarelange wanbestuur, beleidsverwarring en die konstante verswakking van staatsinstellings onder president Ramaphosa se regering. Wanneer ’n land se veiligheid, energie-infrastruktuur, ekonomiese vooruitsigte en regsekerheid gereeld onder internasionale kritiek kom, begin lande eenvoudig afstand doen, en dit is presies wat ons nou sien.

TLU SA waarsku al lank dat die regering se gebrek aan optrede teen plaasaanvalle, die dreigende gevaar van grondonteiening sonder vergoeding, en die voortdurende afswaai van staatsdiensvermoë die land se globale geloofwaardigheid ondermyn. Trump se uitlatings is nie ’n oorsaak nie, maar ’n simptoom van ’n groter probleem: Suid-Afrika word al hoe minder as ’n betroubare vennoot gesien.

Vir boere en landelike gemeenskappe beteken hierdie internasionale reaksies dat die wêreld toenemend bewus raak van die werklikheid op die grond, maar ook dat ons ekonomiese en diplomatieke isolasie kan verdiep as daar nie dringend koers verander word nie. Suid-Afrika kan dit nie bekostig dat politieke teater, beleidsideologie en wanbestuur ons land se toekoms verder skaad nie.

TLU SA sal aanhou druk uitoefen vir regsekerheid, werklike optrede teen misdaad, en ’n regering wat die land se belang bo politieke oorwegings stel. Die wêreld kyk.

TLU SA Sonneblom-toekenning

TLU SA het met groot dankbaarheid en waardering die TLU SA Sonneblom-toekenning tydens sy jaarlikse mediafunksie by die organisasie se kantore in Silverton aangebied. Hierdie toekenning is ’n besondere geleentheid waartydens TLU SA hulde bring aan die joernaliste en mediaplatforms wat deur die jaar uitmuntend presteer in die dekking van landbou, plattelandse sake en die werklikhede waarmee boere daagliks gekonfronteer word.

“Joernaliste is soms die enigste brug tussen die boer se werklikheid en die samelewing se begrip daarvan. Wanneer daardie brug met eerlikheid, balans en die soeke na waarheid gebou word, verdien dit erkenning,” sê Bennie van Zyl, hoofbestuurder van TLU SA.

Lees meer hier.

TLU SA bring hoop en hande werk met “Plant vir die Toekoms”

TLU SA se projek “Plant vir die Toekoms” het vanjaar begin met besoeke aan CVO-skole regoor die land, ’n dinamiese poging om jong mense nader aan landbou te bring. Skole ontvang mieliesaadpakkies en neem deel aan praktiese demonstrasies waar leerders self plant, leer oor volhoubare boerdery en ontdek hoe belangrik landbou vir voedsel-sekuriteit én gemeenskapsontwikkeling is.

Die projek wil nie net sade in die grond kry nie, maar ook hoop, waardering en toekomsvisie in jong harte plant. “Die jeug is die sleutel tot die toekoms van ons land en ons landbousektor,” sê Bennie van Zyl.

TLU SA beoog om die program in 2026 na ’n volledige nasionale projek uit te brei. Hiermee word ’n groeiende netwerk van jong landbou-entoesiaste gebou, ’n ware belegging in die volgende generasie landbouleiers.

Opskerp van paraatheid hierdie feestyd

Volgens Hugo Pretorius, voorsitter van VEIKOM, moet lede dringend hul paraatheid en veiligheidsmaatreëls opskerp. Daar is ’n merkbare styging in plaasaanvalle, saam met ’n toename in brutaliteit, ’n tendens wat ons nie kan ignoreer nie.

Met die naderende Kerstyd beweeg baie vreemdes deur landelike gebiede. Hoewel die meeste geen kwaad bedoel nie, weet ons uit ervaring dat elemente met agendas hierdie tyd van die jaar uitbuit vir kriminele aktiwiteite. Daarom is verskerpte waaksaamheid nie onderhandelbaar nie.

Hugo beklemtoon die volgende kernpunte:

1. Agtergrondsondersoeke is noodsaaklik by álle nuwe indiensnemings. Moenie aannames maak of kortpaaie vat nie.
   
2. Bly aktief betrokke by jou plaaslike veiligheidstrukture, insluitend Plaaswag. Gemeenskapsamewerking bly een van die sterkste verdedigings.
   
3. Sekuriteitsfirmas kan ’n waardevolle rol speel, maar primêre verantwoordelikheid vir veiligheid bly steeds by die boer en sy plaasgemeenskap.
   
4. Die konsekwente toepassing van plaasprotokolle is een van die mees effektiewe maniere om risiko’s te beperk en situasies vinnig te beheer.
   

Hierdie tyd van die jaar vra vir koel koppe, slim beplanning en proaktiewe optrede. Paraatheid is nie paniek nie,  dit is wysheid. Let op, wees sigbaar, kommunikeer vinnig en sorg dat jou mense weet wat om te doen.
TLU SA herinner alle lede: Jou veiligheid begin by jou besluit om voorbereid te wees.

TLU SA bied van die beste voordele aan sy lede, praktiese ondersteuning wat werklik ’n verskil maak. Een van hierdie voordele is ’n nuwe vennootskap met ROCKET

Ons is bly om aan te kondig dat TLU SA nou saam met ROCKET werk om lede toegang te gee tot ’n omvattende noodhulpdiens, spesifiek ingestel op die unieke uitdagings van landelike gebiede.
ROCKET CONNECT is ’n 24-uur nooddiens met toegang tot mediese advies, ambulansvervoer en, indien nodig, vinnige lugvervoer per helikopter. Hierdie diens is ontwikkel met landelike gemeenskappe in gedagte, waar hospitale ver is en tyd in noodgevalle van kritieke belang kan wees.

Deur ROCKET CONNECT het jy altyd toegang tot ’n nasionale noodsentrum wat beman word deur gekwalifiseerde mediese personeel. Hulle bied telefoniese ondersteuning, aktiveer ambulansdienste, en kan selfs lughulp reël wanneer dit nodig is. ’n Maklike mobiele toep help om vinnig jou ligging vas te stel en die naaste hulpbronne te ontbied.

Lede wat inteken, kry toegang tot:

1. 24/7 noodondersteuning
2. Ambulansvervoer
3. Helikopterhulp waar toepaslik *subject to ROCKET’s flight criteria and T&Cs

Die diens kos R75 per maand, ’n bekostigbare premie vir die sekuriteit en gemoedsrus wat dit bied.

By TLU SA glo ons in gesamentlike ondersteuning en volhoubare oplossings vir boere. Hierdie diens vorm deel van ons breër verbintenis om lede se veiligheid te bevorder en realistiese oplossings te bied vir probleme wat dikwels op die plaasoppervlak geïgnoreer word.

Probleme om by TLU SA se digitale biblioteek in te teken?

Ons is bewus daarvan dat sommige lede sukkel om by die digitale biblioteek van TLU SA toegang te kry. In baie gevalle kan dit wees dat jou lidmaatskap onder ‘n ander e- posadres geregistreer is.

Só kry jy toegang:
Jy moet ‘n geregistreerde lid van TLU SA wees. Meld aan met die e-posadres waarop jy ons kommunikasie ontvang. Skep dan ‘n wagwoord – en siedaar – jy het toegang tot ‘n wêreld van kennis en hulpmiddels wat net vir ons lede beskikbaar is.

Indien jy enige probleme ondervind met die aanmeldproses, is jy welkom om vir Roelien van der Walt te kontak by ledesake@tlu.co.za vir bystand.

Besoek nou: www.tlu.co.za

Begroting weereens net ’n oefening in skadebeheer

Ope brief: TLU SA aan President Ramaphosa

Voorgestelde Wetsontwerp op Vuurwapenbeheer

SA se beleidsrigting moet dringend uitgeklaar word