|
|
|
| |
|
|
Die jaar loop vinnig ten einde, en ons boeregemeenskap bly,
soos altyd, getoets op baie fronte, ekonomies, polities en in
terme van veiligheid. Tog bewys Suid-Afrikaanse boere keer op
keer hul veerkragtigheid en geloof.
TLU SA staan steeds vas in sy roeping om ons lede se belange
te beskerm en die stem van die produsent duidelik te laat
hoor. Julle betrokkenheid in gemeenskappe en
veiligheidstrukture bly ’n bron van inspirasie.
Laat ons die laaste deel van die jaar met volharding en
vertroue aanpak. Wie getrou bly in moeilike tye, oes
uiteindelik die vrug van sy arbeid.
Boeregroete
Bennie van Zyl
Hoofbestuurder, TLU SA
|
|
TLU SA loods Projek Plant vir die Toekoms
“Die toekoms van landbou lê in die hande van die jeug”
TLU SA is opgewonde om die begin van sy “Plant vir die
Toekoms”-projek aan te dui, ‘n veldtog wat daarop
gemik is om die jeug van Suid-Afrika betrokke te kry
by die landbousektor en hulle aan te moedig om landbou
as ‘n loopbaan te oorweeg. Hierdie projek is ‘n deel
van TLU SA se verbintenis om hoop vir die toekoms te
plant en die volgende generasie landbouleiers op te
lei, terwyl dit ook bewusmaking skep oor volhoubare
landboupraktyke.
“Die jeug is die sleutel tot die toekoms van ons land
en die landboubedryf. Deur hoop te plant en jongmense
te betrek, wil ons nie net die landbou versterk nie,
maar ook die land se toekoms bou,” sê Bennie van Zyl,
hoofbestuurder van TLU SA.
Lees meer hier.
TLU SA in die internasionale arena
TLU SA het die afgelope tyd verskeie geleenthede gehad
om insette te lewer binne die internasionale arena.
Hierdie betrokkenheid help om die werklikheid van
Suid-Afrika se kommersiële boere in konteks te plaas.
Tog is daar ’n duidelike besef dat die uiteindelike
oplossings vir ons landbou-uitdagings binne ons eie
grense gevind moet word.
Nietemin kan ons
nie die invloed van wêreldgebeure ontken nie. Soos die
wêreld al hoe “kleiner” raak, word internasionale
tendense en markbewegings toenemend bepalend vir
plaaslike uitkomste. Markkragte speel ’n sleutelrol in
die vasstelling van pryse en dien as ’n toets vir
besighede se volhoubaarheid.
Boere ervaar
daagliks hoe internasionale verwikkelinge hul vermoë
beïnvloed om winsgewend plaaslik te produseer. Gereeld
ontstaan vrae oor die tydsberekening en volume van
invoere, soos byvoorbeeld koring, en die effek daarvan
op plaaslike pryse.
Hoewel markkragte
noodwendig pryse bepaal, kan ’n ooraanbod, veral deur
ingevoerde graan net voor die plaaslike oes, plaaslike
pryse tot ’n nie-mededingende vlak laat daal. Die rol
van die Departement van Landbou behoort dus deeglik
oorweeg te word, veral in terme van beskerming van
plaaslike produsente. Daar behoort ernstig oorweeg te
word of invoere nie eerder ná die plaaslike strooptyd
toegelaat behoort te word nie, sodat boere ’n billike
kans kry om in hul eie mark te kompeteer.
Pretoria Boeremark blink uit!
TLU SA is trots op die span agter die Pretoria
Boeremark in Silverton, wat pas drie toekennings
ontvang het: Beste Mark, Beste Handwerkmark en Beste
Kosmark in Pretoria.
Elke Saterdagoggend, dou voor dag, is die
markspan en stalletjie-eienaars gereed om hierdie
uitsonderlike diens aan Pretoria se inwoners te lewer.
Vir dié wat nog nie die mark besoek het nie – hierdie
Saterdag is ’n uitstekende geleentheid om die unieke
atmosfeer en ware boeremensaamhorigheid self te
ervaar.
Beurstoekenning vir landboustudies
TLU SA, in samewerking met Agri Skills Transfer, het
onlangs ’n beurs toegeken aan Ettienne Swart van
Martin Oosthuizen Hoërskool in Kakamas. Ettienne begin
in die 2026/2027 akademiese jaar met sy landboustudies
by Agri Skills Transfer se kampus naby Cullinan.
Die beurs dek beide sy studiegelde en
verblyf, en bied vir Ettienne die geleentheid om sy
landboudrome te verwesenlik. TLU SA spreek hartlike
dank uit teenoor Agri Skills Transfer vir hul
betrokkenheid en toewyding aan die ontwikkeling van
die volgende generasie landboukundiges.
Lees meer hier.
|
|
| |
|
| |
|
TLU SA Limpopo
Goliat van Gat by AgriHX 2026
Ons is vol opgewondenheid oor TLU SA Limpopo se deelname aan
die Goliat van Gat-projek tydens die AgriHX Ekspo by The Ranch
van 19 tot 21 Maart 2026! Die skole werk hard aan hul
voorbereidings.
Ons wag nog vir Pietersburg Hoërskool se foto’s, terwyl
Merensky Hoërskool binnekort begin met hul projek. Eagles Nest
Skool in Polokwane het reeds pragtige foto’s gestuur van hul
vordering, en volgende week word daar by Curro Polokwane
geplant!
Die jeug van Limpopo wys duidelik: die toekoms van landbou is
in goeie hande.
TLU SA Sentraal
Boerebyeenkomste om na uit te sien
Die Cullinan boere-u nooi almal hartlik uit na hul
Landboukorrels Boeredag op 28 November 2025, met die fokus op
pekanneute. Dit beloof om ’n insiggewende dag vir produsente
en belangstellendes te wees. Die koste beloop slegs R150, wat
koffie met aankoms en ’n ete ná afloop insluit. Navrae en
besprekings vir bywoning: Henri Combrink – 082 552 9428 of
Lynette du Plessis – sentraal@tlu.co.za. Uitstallers is ook
welkom!
Intussen maak Balfour gereed vir hul gewilde
Hooidag op 21 Januarie 2026, dié keer op ’n nuwe perseel op
die R23, sowat 5 km buite Balfour in die rigting van
Heidelberg. Merk solank die datum in jou dagboek – besoekers
kan uitsien na hooi-toerusting, demonstrasies en ’n
verskeidenheid stalletjies wat vir lewendige landbou-pret gaan
sorg.Uitstallers wat plek wil bespreek, kan Dawie Brits kontak
by 082 884 5503.
TLU SA Vrystaat
TLU SA-Vrystaat dryf veldtog vir beskerming van
landbouhulpbronne
Met groot kommer neem TLU SA-Vrystaat kennis van bedreiging
van landbouhulpbronne in die Vrystaat. Oorbeweiding met
gevolglike toestroming na weiding wat elders beset word,
bedreiging van hoë potensiaal landbougrond, oorgrens-verhuring
van hoë potensiaal weiding in Oos-Vrystaat en onregmatige
verkoop van klein stukkies grond aan opkomende landbouers,
bring landbouhulpbronne onder druk en veroorsaak 'n skerp
toename in mynbouaktiwiteite op landbougrond. Tesame met
wydverspreide veldbrande, gevolglike toenemende gronderosie,
besoedeling van waterhulpbronne en toename in indringerplante
staar Suid-Afrikaanse landbouers toenemende druk in die gesig.
Die uitkringende effek van hierdie tendense op aangrensende of
naasliggende landbougrond het groot kommer onder
Suid-Afrikaanse landbouers in die algemeen en Vrystaatse boere
tot gevolg. Tesame met die impak van mynbou-aktiwiteite en
onregmatige grondbesettings, word gesprek op die hoogste vlak
met die regering ʼn dringende aangeleentheid.
Landbouproduksie is afhanklik van landbouhulpbronne
Landbouproduksie en aanwending van landbouhulpbronne is
noodsaaklik vir die voortbestaan en ontwikkeling van die
Suid-Afrikaanse bevolking. Gebrek aan ordelike vestiging op
landbougrond, toename in mynbou-aktiwiteite in landelike
gebiede en oorgrens besettings van landbougrond baar toenemend
kommer oor die impak wat sodanige praktyke op landbouproduksie
kan hê om in die toenemende behoeftes van die land te
voorsien. Tradisioneel het die Republiek van Suid-Afrika (RSA)
ʼn belangrike strategiese rol ten opsigte van
voedselvoorsiening vervul – nie alleen vir die Suid-Afrikaanse
bevolking nie maar ook aan ander lande wat nie voldoende
voedsel produseer en in die voorsienbare toekoms nie in staat
sal wees om in hul eie behoeftes te voorsien nie. Voorts is
dit belangrik om kennis te neem van die feit dat die
bevolkingsaanwas in Afrika hoër is as in die res van die
wêreld en dat die RSA op sy beurt weer hoër is as die res van
Afrika. Teen hierdie agtergrond kan die belang van
landbouhulpbronne veral topografie, klimaat, grond, weiding en
waterbronne nie oorbeklemtoon word nie. Voorts beskik die RSA
oor ongeveer 103 miljoen ha vir landbouproduksie. Die RSA is
egter nie goed voorsien van hoë potensiaal landbougrond nie.
Van die totale oppervlakte beskikbaar vir landbou is daar
ongeveer 15% wat geskik is vir bewerking. Goeie landbougrond
beslaan egter slegs ongeveer 4% van die totale oppervlakte.
Dié oppervlakte is vir nagenoeg 40% van die totale waarde van
landbouproduksie verantwoordelik. By verre die grootste
gedeelte (85%) van die landsoppervlakte word deur natuurlike
weiveld beslaan. Weivelde in die RSA beskik nie oor hoë
potensiaal nie. Ongeveer 25% daarvan beskik oor ʼn dravermoë
van naastenby 18 ha per grootvee-eenheid, terwyl ʼn verdere
bykans 30% ʼn dragkrag het van 8 ha tot 15 ha per
grootvee-eenheid. Dit dui daarop dat meer as die helfte van
die weiveld oor ʼn relatiewe lae dravermoë beskik.
TLU SA-Vrystaat ondersteun TLU SA se volgehoue inisiatiewe om
bestaande meganismes - statutêr en andersins - te benut om die
toekoms van landbou te verseker. 'n Beroep word op ons lede
gedoen om praktyke wat landbouhulpbronne onder druk plaas aan
te meld sodat tydige stappe geneem kan word om winsgewende en
volhoubare landbou vir die volgende generasie landbouers te
verseker.
|
| |
|
|
Slim Tegnologie Transformeer Suid-Afrika se Landbou Vir
onmiddellike vrystelling – OTT Agri Tech
Suid-Afrika se landbou beweeg vinnig in ʼn nuwe era in.
Een waar data, IoT (Internet of Things), kunsmatige
intelligensie (AI) en energiebestuur die ploeg, die veld
en die mark byeenbring. Te midde van veranderende
klimaatspatrone, stygende insetkoste en die behoefte aan
volhoubare voedselproduksie, word tegnologie die
spilpunt waarom doeltreffende, winsgewende en volhoubare
boerdery draai.
OTT Agri Tech – die landboutegnologie-afdeling van
Omnitell Tech (OTT) en deel van die White Pearl
Technology Group – speel ʼn leidende rol in hierdie
transformasie. Deur wêreldklas digitale innovasie,
energiebestuur en kundigheid in IoT, wolkrekenaars,
mobiele tegnologie en kunsmatige intelligensie te
kombineer, word ʼn nuwe generasie boerdery in Suid-Afrika
moontlik gemaak: slim, presies en geïntegreerd.
Lees meer hier.
TLU SA bied van die beste voordele aan sy lede,
praktiese ondersteuning wat werklik ’n verskil
maak. Een van hierdie voordele is ’n nuwe
vennootskap met ROCKET
Ons is bly om aan te kondig dat TLU SA nou saam met
ROCKET werk om lede toegang te gee tot ’n
omvattende noodhulpdiens, spesifiek ingestel op die
unieke uitdagings van landelike gebiede.
ROCKET CONNECT is ’n 24-uur nooddiens met toegang
tot mediese advies, ambulansvervoer en, indien nodig,
vinnige lugvervoer per helikopter. Hierdie diens is
ontwikkel met landelike gemeenskappe in gedagte, waar
hospitale ver is en tyd in noodgevalle van kritieke
belang kan wees.
Deur ROCKET CONNECT het jy altyd toegang tot ’n
nasionale noodsentrum wat beman word deur
gekwalifiseerde mediese personeel. Hulle bied
telefoniese ondersteuning, aktiveer ambulansdienste, en
kan selfs lughulp reël wanneer dit nodig is. ’n
Maklike mobiele toep help om vinnig jou ligging vas te
stel en die naaste hulpbronne te ontbied.
Lede wat inteken, kry toegang tot:
- 24/7 noodondersteuning
- Ambulansvervoer
-
Helikopterhulp waar toepaslik *subject to
ROCKET’s flight criteria and T&Cs
Die diens kos R75 per maand, ’n bekostigbare
premie vir die sekuriteit en gemoedsrus wat dit bied.
By TLU SA glo ons in gesamentlike ondersteuning en
volhoubare oplossings vir boere. Hierdie diens vorm deel
van ons breër verbintenis om lede se veiligheid te
bevorder en realistiese oplossings te bied vir probleme
wat dikwels op die plaasoppervlak geïgnoreer word.
Probleme om by TLU SA se digitale biblioteek in te
teken?
Ons is bewus daarvan dat sommige lede sukkel om by die
digitale biblioteek van TLU SA toegang te kry. In baie
gevalle kan dit wees dat jou lidmaatskap onder ‘n ander
e- posadres geregistreer is.
Só kry jy toegang:
Jy moet ‘n geregistreerde lid van TLU SA wees. Meld aan
met die e-posadres waarop jy ons kommunikasie ontvang.
Skep dan ‘n wagwoord – en siedaar – jy het toegang tot
‘n wêreld van kennis en hulpmiddels wat net vir ons lede
beskikbaar is.
Indien jy enige probleme ondervind met die
aanmeldproses, is jy welkom om vir Roelien van der Walt
te kontak by ledesake@tlu.co.za vir bystand.
Besoek nou:
www.tlu.co.za
|
|
| |
|
| |
|
TLU SA-werkswinkel oor grondeise
|
TLU SA verwelkom debat oor werklike ekonomiese
insluiting
|
|
Groot opgewondenheid oor die 2026 Goliat van Gat
Pampoenfees
|
AAMP: ’n Meesterplan sonder boere
|
|
| |
|
|
|
| |
| |
|
