Daar heers ’n groot opgewondenheid en afwagting oor die Goliat van Gat pampoengroei-kompetisie vanjaar.
Die volgende kompetisie vind plaas op 14 Maart 2026 by Lavender Kontrei Mark in Wonderboom, Pretoria.
Dit is nou planttyd, en almal is besig om pitte te ontkiem en uit te plant om te kyk of hulle daardie R35 000 prysgeld vir ’n 1 ton pampoen, geborg deur Laeveld Agrochem, kan wen. Daar is ook ’n verskeidenheid pryse vir deelnemers.
Hierdie jaar is die jaar van die jong kwekers by die Goliat van Gat pampoengroei-kompetisie.
Dr. Böhmer Vaardigheidskool in Bloemfontein gaan ook Goliat van Gat-pitte plant om hul leerders ’n bietjie blootstelling te gee aan landbouproduksie.
Curro Heuwelkruin in Pietersburg, onder leiding van landboujuffrou Christelle Coetzee, se leerders gaan ’n pampoen kweek om in te skryf by die AgriXpo in Pietersburg, Maart 2026.
Dit is lekker om die oplewing onder die jong kwekers te sien.
Benewens die kompetisie in Pretoria hou TLU SA Limpopo ook ’n kompetisie by AgriXpo in Pietersburg. Daar is ook verskeie gemeenskapskompetisies wat plaasvind in ander streke.
’n Ander hoogtepunt is die toevoeging van die groot groentesoorte soos skorsies, murgpampoene, waatlemoene, tamaties, ensovoorts.
Daar is ook ’n pampoengereg-kompetisie wat beoordeel word deur Steyn’s Culinary School van Hatfield, Pretoria.
Die dag sluit in vermaak vir almal, pampoenpitspoeg, pampoenresies, stalletjies, kindervermaak, en nog baie meer.
Die pryse vir die kompetisie word moontlik gemaak deur ons borge: Uitkyk Vleismark, Laeveld Agrochem, Rolfes Agri, en Capital Scales.
Pitte is nog beskikbaar by Henri Combrink (082 552 9428) of by Mariëtte by TLU SA se kantore (012 804 8031).
