TLU SA neem kennis van die stigting van ‘n nuwe landbou-organisasie in die Limpopo provinsie. Ons wil u, as lid en vriend van TLU SA, bedank vir die vertroue wat u in u strukture het. TLU SA se bestaansreg is nog altyd gegrond op die volgende doelstellings, soos vervat in ons Grondwet:

1. Om landbou-gefokus, die lede van TLU SA te organiseer in ʼn eenheid wat hom beywer vir die ekonomiese en finansiële welvaart en die behoud van eiesoortige Christelike kulturele waardes van sy lede met die doel om lede veilig en volhoubaar op hul grond te hou. 
2. Om die beginsels van privaat besitreg en die vrye mark uit te bou en te onderskryf. 
3. Om die menings van alle lede van TLU SA te koördineer oor sake van algemene en/of besondere belang.
4. Om die beginsel van kollektiewe bedinging onder sy lede te bevorder. Die ondernemingsvorm waarvan gebruik gemaak sal word sal verkieslik die koöperatiewe ondernemingsvorm wees, maar afhangende van wetgewing en/of die bepaalde behoefte kan ander ondernemingsvorme ook benut word. 
5. Om die fondse waaroor TLU SA beskik en mag bekom, slegs vir die bevordering van sy doelstellings aan te wend. 
6. Om die strukture van TLU SA nie tot voordeel van party-politieke belang of die belang van organisasies of individue met party-politieke doelstellings te gebruik nie.

Ledebelange by TLU SA word vanuit die lede self bestuur en lede het insae in die besluitnemingsproses deur middel van die strukture, vanaf Boerevereniging-, Boereunie-, Distrik landbou-unie- en Streek-vlak tot by die Algemene Raad, Uitvoerende Komitee en Kongres, waar verkose leierboere ons verteenwoordig. Dus staan dit elke lid vry, en is dit iets wat aangemoedig word, om insette en voorstelle te maak deur aktief betrokke te wees op welke vlak ook al.

Boerdery, en dit waarvoor ons as lede van TLU SA staan, word tans op alle fronte bedreig. Dit is dus krities belangrik dat ons ons belange beskerm deur saam te werk om ons kommersiële boere veilig en volhoubaar op ons plase te hou.  Elkeen van ons kan, en moet ‘n verskil maak.

Dankie dat jy daardie verskil maak deur jou passie uit te leef.

Groete
Henry Geldenhuys
TLU SA President

Kragvoorsiening steeds baie wispelturig  

TLU SA en MarketVest het geruime tyd gelede hande gevat oor die daarstelling van betroubare, kostedoeltreffende energie-oplossings. Finansiering van stelsels was ‘n probleem en is daar nou ‘n oplossing daarvoor gekry.

Dit is geen geheim dat baie boere en Suid-Afrikaners in die algemeen,  gefrustreerd is met Eskom se dienslewering. Slimmeters beloof groot voordele, maar rekeninge kom dikwels onrealisties onakkuraat en opgeblaas aan, met oplossings wat deur eindelose verskonings vertraag word. Voeg daarby groot prysverhogings en voortdurende kragonderbrekings en dit is duidelik waarom energiebetroubaarheid een van die grootste bedreigings vir plaasbedrywighede bly.

As deel van ons voortdurende verbintenis om kommersiële boere te ondersteun, het TLU SA 'n vennootskap aangegaan met MarketVest, spesialiste in kragbestuur en alternatiewe energie-oplossings. MarketVest benut sonkrag, batteryberging en slim kragopwekker-integrasie om koste te verminder, energiegebruik te optimaliseer en betroubare krag te lewer, selfs tydens lasvermindering.

Oplossings kan eenvoudig wees ('n kompakte sonkragstelsel vir sleutellaste) of omvattend ('n volledige energieherontwerp met motorbeheer, sagte-aansitters en gefaseerde aanvang om piek-aanvraag te verlaag en toerusting se lewensduur te verleng). Hierdie benadering help boere om onafhanklikheid te bou en langtermyn-koste te beheer.

As stygende elektrisiteitskoste of onbetroubare toevoer jou plaas raak, nooi ons jou uit om MarketVest vir 'n gratis, nie-verpligte lessenaar-behoefte-analise te kontak. Vir elke suksesvolle transaksie kry TLU SA ‘n verwysingsfooi.

'n Pasgemaakte ontwerp en voorlopige kwotasie sal voorberei word gegrond op bepaalde inligting wat verskaf moet word. Indien dit pas, is buigsame finansieringsopsies beskikbaar deur hul vennote, insluitend huur-na-eienaarskap-reëlings of Power Purchase Agreements (PPA), onderhewig aan standaard krediet- en finansiële vereistes.

Hierdie vennootskap rus TLU SA-lede toe met praktiese gereedskap om terug te veg teen Eskom se uitdagings en langtermyn-energie-onafhanklikheid op te bou. Vir meer besonderhede of om te begin, kontak MarketVest direk:

Web: marketvest-int.com
E-pos: Andreas@marketvest-int.com
Telefoon: Andreas 082 5666 848, Karel 072 828 8351, Hennie 083 456 9756
Adres: 5 Roos Street, Bayhill Building, Fourways Golf Office Park, Sandton 2068

Nuus uit Hoofkantoor

Die direksie van die Pretoria Boeremark het onlangs die operasionele funksionering van die mark en die spesifieke take van die personeel deeglik hersien om optimale effektiwiteit te verseker. Dit het gelei tot die besluit om die rolle van die huidige Markbestuurder in twee afsonderlike poste te verdeel: Bestuurder: Administrasie en Bestuurder: Terrein. Die direksie het sy opregte dank uitgespreek teenoor die Markbestuurder en al die personeel vir hul onbaatsugtige diens en die merkwaardige resultate wat deurentyd behaal is. Dit is geen wonder dat die Pretoria Boeremark steeds erken word as een van die beste markte in Pretoria nie!

Belangstellendes wat graag aansoek wil doen vir een van bogenoemde kontrakposte of meer inligting wil bekom, kan navrae rig aan fin@tlu.co.za

Die vergoeding vir die kontraktuele werk is onderhandelbaar.

Nuus uit die Vrystaat

Waterbronne in die spervuur

TLU SA Vrystaat is begaan oor die agteruitgang van waterbronne in Suid-Afrika in die algemeen en die Vrystaat in besonder. Verskeie bewusmakingsprojekte word in vooruitsig gestel om dié tendense aan te spreek insluitend gesprekke met rolspelers in regeringskringe en die privaatsektor.

Waterhulpbronne in Suid-Afrika is beperk. Tans word ongeveer 80% van die beskikbare watervoorrade deur die landbousektor benut en na verwagting sal die landbousektor nie op aansienlike toename in waterverbruik kan steun nie. Doeltreffende en oordeelkundige aanwending van beskikbare waterbronne sal gevolglik die wagwoord in die landbousektor moet wees. Die impak van besoedeling op sowel onderaardse as oppervlakte waterbronne is reeds van so ʼn omvang dat natuurlike waterbronne dreig om in sommige gebiede landbou-aktiwiteite teen ʼn hoë tempo onbruikbaar vir sowel menslike as dieregebruik te maak. Die oppervlakte waterbronne van die land het oor jare aansienlike verandering en agteruitgang openbaar. Op talle plase is die ou name wat ʼn permanente stroom of sterk fonteine impliseer, nie meer van toepassing nie. Plaaswonings wat by destydse standhoudende waterbronne aangelê is, staan vandag verlate met geen teken van enige waterbron in die omgewing nie. Die kwaliteit van water wat in meeste van ons riviere vloei, word ook erg benadeel deur sedimentasies wat waterkapasiteit van opgaardamme sleg affekteer. Bykomend tot die genoemde implikasies vir waterbronne in Suid-Afrika, het versuiping en mineralisasie oftewel, soos dit algemene bekend staan, verbrakking ʼn uitkringende effek getoon. Na beraming is sowat 100 000 ha besproeiingsgrond in die RSA aan verskillende grade van versuiping en verbrakking onderhewig. Hierdie gronde beskik oor groot landboupotensiaal en beperking van verbrakking het bygevolg dringend geword.

Langs die weg van bewusmaking glo TLU SA Vrystaat dat die bewaring van landbouhulpbronne, veral water, vir die volgende geslag landbouers verseker kan word.

Garies Boeredag 

Garies Boeredag 2026 bring weer die hart van landbou na Namakwaland. Dit is ’n dag waar boere, besighede en gemeenskap saamkom om kennis te deel, netwerke te bou en die landboubedryf te vier.

Met beperkte sitplekke en ’n unieke wynproe-ervaring, beloof die dag om nie net insiggewend nie, maar ook besonders gesellig te wees. Van praktiese oplossings tot goeie geselskap, Garies Boeredag is waar mense en moontlikhede ontmoet.

Bespreek vroeg en wees deel van ’n dag wat werklik saak maak vir landbou. 

Eiendomsreg konferensie in Bredasdorp

TLU SA in samewerking met die Ad Hoc groep vir die Beskerming van Privaat Eiendomsreg bied op 9 September 2026 om18:00 ‘n Eiendomsregkonferensie aan in Bredasdorp. Dit is gedurende die week wat Nampo Kaap gedurende die dag plaasvind. Die aantasting van Eiendomsreg in vele vorme sal aangespreek word. Daar word nie net op ons titelaktes ‘n aanslag geloods nie, maar ook op ons kulturele erfenis en wil ons die aand aandag gee aan oplossings eerder as om net die probleme toe te lig. Persone wat graag fisies wil bywoon sal vooraf moet bespreek by Mariette by sekretaresse@tlu.co.za aangesien beperkte sitplekke beskikbaar gaan wees. Die beplanning is om die geleentheid op te neem, waar daar dan vir belangstellendes ‘n skakel beskikbaar gestel sal word om dit aanlyn te kyk.