Met NAMPO 2026 wat van 12 tot 15 Mei plaasvind, maak TLU SA weer gereed om deel te wees van een van die grootste en belangrikste landboubyeenkomste in Suid-Afrika. Nampo bly jaarliks ’n kerngeleentheid waar produsente, landbou-ondernemings, organisasies en die breër publiek bymekaarkom om die nuutste ontwikkelinge in die sektor te beleef.

Vir TLU SA is Nampo veel meer as net ’n uitstalling. Dit is ’n waardevolle platform waar daar met lede geskakel word, nuwe verhoudings gebou word en gesprekke gevoer word oor die uitdagings én geleenthede wat kommersiële en familieboere daagliks ervaar. Dit bied ook die geleentheid om die organisasie se werk, visie en betrokkenheid regoor die land sigbaar te maak.

Lede en besoekers word hartlik uitgenooi om by TLU SA se stalletjie in die Namposaal te kom inloer. Soos in vorige jare sal die gewilde kompetisie met aantreklike pryse weer sorg vir groot belangstelling en ekstra voete na die stalletjie lok. Dit skep ’n ontspanne ruimte waar mense kan kuier, vrae vra en meer oor TLU SA se rol in georganiseerde landbou kan uitvind.

In ’n tyd waar landbou toenemend onder druk verkeer, bly geleenthede soos Nampo belangrik om die veerkragtigheid, innovasie en trots van Suid-Afrikaanse boere uit te leef. TLU SA sien daarna uit om weer saam met duisende produsente en belanghebbendes deel te wees van hierdie besondere viering van landbou.

Boeregroete
Bennie van Zyl
Hoofbestuurder, TLU SA

BKS-krisis vra dringende optrede en daadwerklike samewerking

Die hantering van BKS wek wydverspreide frustrasie, veral weens ’n gebrek aan dringendheid by besluitnemers. Op 20 Januarie 2026 het die minister van landbou, John Steenhuisen, ’n koördineringskomitee (ICC) uit die landbousektor saamgestel om insette aan die departement te koördineer. Die komitee het weekliks vergader met een doel: om die sektor so vinnig moontlik te herstel sodat die verhandeling van vee kan hervat.
Die kern van die oplossing lê eerstens by die spoedige verkryging en toediening van entstowwe wat nou landwyd noodsaaklik is weens die uitbreiding van gevalle. Sonder om voorbeelde te noem van gebrekkige prestasie deur die staat, kan dit bevestig word dat privaat kundigheid op alle vlakke noodsaaklik is om die krisis aan te spreek. Verder is dit ook nodig dat kritieke aspekte soos bewegingsbeheer, kwarantynvereistes en biosekuriteitsriglyne beslag kry. Hierdie elemente vereis geïntegreerde besluitneming en uitvoering, iets wat tot dusver ontbreek het.

Daar bestaan min twyfel dat die staat se hantering van hierdie “staatbeheerde” siekte ernstige gevolge veroorsaak het. Die sektor dra nou die koste. Beperkings in bestaande wetgewing en regulasies het die situasie verder bemoeilik.

TLU SA se uitvoerende komitee het litigasie as ’n laaste uitweg beskou, maar nie uitgesluit nie. Reeds einde Januarie het die ICC ’n Seksie 10-aansoek aan die minister voorgelê om die privaat sektor se kundigheid en kapasiteit by entstofverkryging en -toediening te betrek. Die departement se trae reaksie en versuim om samewerking met die ICC en die minister se taakgroep (MTT), waar van die beste veeartsenykundigheid versamel is, te formaliseer, is herhaaldelik gekritiseer.

In ’n onlangse hofsaak het die minister ’n aangepaste weergawe van die ICC se voorstel ingedien as bewys van vordering, ’n stap wat die betekenis van “besig wees” bevraagteken. Die hof het beslis dat ’n Seksie 10 teen 17 April gepromulgeer moet word. Ongeag die hofsuitspraak, wat verwelkom word in die sin dat die voeteslepery deur die departement nou met ’n hofbevel beëindig word, verg dit steeds dat al die rolspelers oor die inhoud van sodanige dokument moet saamstem.

Die minister het op 10 April ’n getekende Seksie 10 in die Staatskoerant gepubliseer. Daar is sewe dae vir kommentaar gegee. Dit word betreur dat die ICC se versoek dat al die rolspelers saam die inhoud bepaal, verontagsaam is. Die deur is oop vir baie kommentare, aangesien daar verskeie aspekte is wat ooglopend nie gemak by die landbousektor sal skep nie. TLU SA gee onafhanklik hul kommentaar en sal ook deur die ICC insette lewer.

Te veel tyd is reeds verlore, veral weens ’n gesentraliseerde benadering tot beheer. Verdere knelpunte sluit in stadige prosesse by SAHPRA en die poging om Onderstepoort Biological Products in die verspreidingsketting in te voeg, wat koste en vertragings verhoog.

Hoewel sommige meen vroeë litigasie sou beter gewees het, bly die werklikheid dat selfs ’n hofuitspraak praktiese implementering vereis. Kundiges uit die MTT het waardevolle insette gelewer, maar samewerking tussen alle rolspelers bly noodsaaklik. Tot dusver is hierdie insette grootliks geïgnoreer binne ’n gefragmenteerde besluitnemingsraamwerk.

Deurlopende gesprekke met die litigante groepe het plaasgevind, en dit was en is steeds vir almal belangrik om uitkomste in belang van die sektor te verkry. ’n Gesentraliseerde kultuur van beheer en besluitneming in staatsfunksionering op verskeie vlakke bly die hekkie in die pad daarvan om die vyand, naamlik BKS, na behore te beveg. Dit is die ervaring wat tans op alle vlakke in Suid-Afrika by vele staatsinstellings ervaar word. Die uiteindelike prys word deur boere en hul vee op grondvlak betaal.

Springbokvlakte Sonneblomprojek wys boeregees en streekstrots

Die TLU SA Roedtan Boerevereniging se Springbokvlakte Sonneblomprojek groei as ’n praktiese inisiatief wat produsente saambring rondom opbrengs, innovasie en gemeenskapsbetrokkenheid. Die projek moedig boere aan om sonneblom aan te plant, opbrengste te vergelyk en kennis met mekaar te deel oor kultivarkeuses, produksiemetodes en winsgewendheid op die Springbokvlakte.

Meer as net ’n kompetisie, skep die projek gesonde mededinging en wys dit wat moontlik is wanneer produsente hul ervaring en kundigheid inspan. Dit beklemtoon ook die belangrike rol wat sonneblom as gewas in die streek se landbou-ekonomie speel.

Wat die projek besonders maak, is dat dit nie net op tonnemaat fokus nie, maar ook op kwaliteit, volhoubaarheid en die waarde wat georganiseerde landbou in landelike gemeenskappe kan ontsluit. In baie gevalle word fondse uit sulke projekte teruggeploeg in plaaslike inisiatiewe en veiligheidsprojekte.

Die Springbokvlakte bly een van Suid-Afrika se ikoniese produksiegebiede, en die Sonneblomprojek is nog ’n bewys dat daar op die platteland steeds visie, trots en ondernemingsgees leef.

Nuus uit Hoofkantoor

Lydia Bopape groet ná 44 jaar se diens

Met opregte dankbaarheid neem TLU SA afskeid van Lydia Bopape ná 44 jaar van lojale en toegewyde diens. Lydia het oor die jare verskeie take verrig en was onder meer bekend vir haar noukeurige werk in die argief, waar sy altyd enige dokument kon opspoor. Haar bydrae oor meer as vier dekades getuig van toewyding, kennis en diensbaarheid. Ons spreek ons opregte dank en waardering uit vir haar merkwaardige pad saam met TLU SA.

TLU SA Omgewingsakekomitee ontmoet minister

Onder leiding van die nuwe voorsitter van die Omgewingsakekomitee, Francois Prinsloo, het TLU SA op 30 Maart met die minister van Bosbou, Visserye en Omgewingsake, Willie Aucamp, vergader. Belangrike kwessies soos mynbou-aktiwiteite, onbehoorlike rioolbestuur deur munisipaliteite en die impak van besoedeling op landbou is bespreek. Die vergadering het nuwe deure oopgemaak vir verdere gesprek en samewerking oor sake wat produsente direk raak.

Garies Boeredag 

Garies Boeredag 2026 bring weer die hart van landbou na Namakwaland. Dit is ’n dag waar boere, besighede en gemeenskap saamkom om kennis te deel, netwerke te bou en die landboubedryf te vier.

Met beperkte sitplekke en ’n unieke wynproe-ervaring, beloof die dag om nie net insiggewend nie, maar ook besonders gesellig te wees. Van praktiese oplossings tot goeie geselskap, Garies Boeredag is waar mense en moontlikhede ontmoet.

Bespreek vroeg en wees deel van ’n dag wat werklik saak maak vir landbou. 

Eiendomsreg konferensie in Bredasdorp

TLU SA in samewerking met die Ad Hoc groep vir die Beskerming van Privaat Eiendomsreg bied op 9 September 2026 om18:00 ‘n Eiendomsregkonferensie aan in Bredasdorp. Dit is gedurende die week wat Nampo Kaap gedurende die dag plaasvind. Die aantasting van Eiendomsreg in vele vorme sal aangespreek word. Daar word nie net op ons titelaktes ‘n aanslag geloods nie, maar ook op ons kulturele erfenis en wil ons die aand aandag gee aan oplossings eerder as om net die probleme toe te lig. Persone wat graag fisies wil bywoon sal vooraf moet aanlyn registreer aangesien beperkte sitplekke beskikbaar gaan wees. Die beplanning is om die geleentheid op te neem, waar daar dan vir belangstellendes ‘n skakel beskikbaar gestel sal word om dit aanlyn te kyk.