| TLU SA Noord hou konferensie
TLU SA Noord het Woensdag, 21 Augustus, hul jaarlikse konferensie in die Loskopvallei Boere-Unie saal in Groblersdal aangebied. Van vroegoggend het talle TLU SA-lede, boere en belanghebbendes die saal gevul om deel te neem aan 'n dag vol insiggewende sessies en inspirerende praatjies.
Die saal was pragtig versier met bergrosies en modeltrekkers, terwyl oulike boodskappe en getekende plaasprentjies deur die Gr R-klas van CVO Gromar 'n persoonlike atmosfeer geskep het, wat perfek ingepas het by die konferensie se tema, "Verjong die Platteland."
Die oggend is gepas geopen deur ds. Julian Olivier, waarna mnr. Henk van de Graaf, voorsitter van TLU SA Noord, die verwelkoming en voorsittersverslag hanteer het. Mnr. Goosen Lombard, NTK Streeksdirekteur van die VKB Groep, het boere aangemoedig om verandering te omarm deur te benadruk: "Change is difficult. Not changing is fatal."
Mnr. Julian Kuik, van Octu Chem, het daarna die konferensie se hoofborg verteenwoordig en insig gegee oor die belangrike rol wat hulle speel in die verskaffing van industriële en landbouchemikalieë. Mnr. Clemens Senekal, voorsitter van TLU SA se jongboerekomitee, het verder uitgebrei oor die belangrikheid van aanpassing in landbou en die noodsaaklikheid om die platteland te moderniseer, terwyl tradisies en waardes behou word.
Mnr. Stiaan Hugo, algemene bestuurder by AGI Frost Fans, het 'n relevante aanbieding gedoen oor hulle elektries aangedrewe waaiers wat boere help om skade te voorkom tydens ongewone koue periodes in Limpopo. Ná hierdie insiggewende oggend is tee, koffie, en eetgoed bedien, terwyl nominasievorms vir die nuwe dagbestuur van TLU SA Noordstreek ingedien is.
Prof. André Louw, van die Universiteit van Pretoria, het jongmense aangespoor om ekonomiese geleenthede in landbou aan te gryp, terwyl mnr. Andries Wiese van Hollard Insure oor volhoubaarheid en die belangrikheid van doelgerigte aanpassing gesels het.
Me. Roné Hennop het met besoekers gesels oor minimumloon impaknavorsing, en mnr. Bennie van Zyl, hoofbestuurder van TLU SA, het weer die noodsaak van volhoubare boerdery beklemtoon.
Die dag is afgesluit met 'n voorstel vir die verandering van die grondwet, 'n tafelgebed, 'n heerlike ete, en 'n gesellige samesyn. |
TLU SA Noord word TLU SA Limpopo
Op 17 Julie 2024 het 'n belangrike vergadering tussen TLU SA Noord en die hoof van Limpopo se Rampbestuursentrum, dr. TD Makananisa, plaasgevind. Hierdie vergadering het plaasgevind in die lig van die onlangse swartryp- en brandskade wat die streek getref het. Dit was duidelik dat 'n nuwe benadering nodig is om effektief te kan reageer op die uitdagings waarmee ons boere te kampe het.
Tydens die vergadering het dit duidelik geword dat die naam "TLU SA Noordstreek" nie meer optimaal was vir die funksies en verantwoordelikhede van die streek nie. Die term "Noord" het slegs geografiese betekenis en skep verwarring, veral in kommunikasie met die publiek en media. Dit het ook geblyk dat die streekbestuurder in werklikheid as 'n provinsiale bestuurder funksioneer, wat verder ondersteun het dat 'n naamsverandering nodig is.
Die voorstel om die naam te verander na "TLU SA Limpopo" is dus nie net 'n verandering nie, maar 'n praktiese stap om groter duidelikheid en effektiwiteit te verseker. Die naam Limpopo, wat geassosieer word met die bekende rivier, dra geen politieke konnotasies nie en het 'n lang geskiedenis in die streek. Hierdie verandering is tydens die Streekkonferensie op 21 Augustus 2024 voorgelê en goedgekeur.
Die nuwe Dagbestuur van TLU SA Limpopo is ook aangewys.
Hendrik Botha, 2de Vise
Erika Helm, Vise Voorsitter
Danie Prins en Fanie Havinga, Voorsitter
Voor staan Wilma Prinsloo en Rone Hennop. |
