Droom ons nog van ‘n beter lewe, en hou ons nog vas aan hoop? Ware hoop kan slegs standhou as dit op ‘n stewige geloofsbasis gegrond is. Wanneer ons morele kompas gerig is deur die Woord van God, wat dien as ons fondament en riglyn, kan ons met vertroue hoop. Hebreërs 11:1 herinner ons: “Die geloof dan is ‘n vaste vertroue op die dinge wat ons hoop, ‘n bewys van die dinge wat ons nie sien nie.” Wanneer ons wandel volgens God se verordeninge, val alles in plek. Ons verhoudings met mense, en veral ons interaksies met mekaar, kry ‘n nuwe dimensie. Dit is in hierdie konteks dat ons kultuuropdrag gestalte kry, met die fokus op ons primêre taak hier op aarde—om eerstens tot eer van God te leef, uit dankbaarheid vir die talente wat ons deur genade ontvang het.
Bou ons of breek ons? Wanneer ons sommige inskrywings en kommentare op sosiale media lees, ontstaan ernstige vrae oor die motiewe agter die woorde. Wat poog die skrywer om te bereik? TLU SA streef daarna om, in ooreenstemming met ons grondwet en manifes, ‘n lewens- en wêreldbeskouing van realistiese hoop prakties uit te leef. Hiermee kom ‘n verantwoordelikheid. Dit het net waarde as ons, as lede, hierdie hoop in ons dade uitleef.
Foto Tobin Rogers | Unsplash
