Tydens ’n komiteevergadering van die Pretoria Landbouw Maatskappij in 1896 het die agenda voorsiening gemaak vir die stigting van ’n Transvaalse Landbou-Unie. FT Nicholson word beskou as die stigter van die Transvaalse Landbou-unie.

Van 1899 tot 1902 woed die Anglo-Boereoorlog.
Met Brittanje se Verskroeide Aarde-beleid word plaashuise afgebrand, gesaaides en veestapels word vernietig en vroue en kinders word in konsentrasiekampe geïnterneer.
TLU speel ’n belangrike rol om landbou na verloop van die oorlog weer op te bou.

By die sesde kongres in Januarie 1905 in Standerton het die TLU gevra vir die daarstelling van ’n Landbank.

Tydens die negende kongres in 1908 lig die destydse President van die hoogtepunte uit wat deur die Unie tot stand gebring is, waaronder die stigting van ’n landbouskool, die stigting van ‘Proefboerderijen’, die publikasie van ’n landboutydskrif en vele meer.

Edith O’Connor stel ’n vroue-afdeling vir die TLU voor nadat sy vrou-alleen boer na haar man se afsterwe. Die eerste tak van die Transvaalse Vroue-Landbou-unie (TVLU) word in 1925 gestig.

In Augustus 1944 spog die Uitvoerende Komitee
met ’n boufonds van #6 500 geoormerk vir die bou
van ’n boereklub, kantore en konferensiesale.

Op 31 Mei 1958 word die eerste vlag van die
Transvaalse Landbou-unie in gebruik geneem.

In 1967-‘68 staan die TLU ledetal op 24 000 lede.

TLU Streekskantore word in 1971 geopen.

Die Pretoria Boeremark kom in 1991 tot stand.
Die konsep van die Boeremark berus op ’n verkorting
in die prysketting tussen die produsent en die verbruiker,
wat tot beide partye se voordeel strek. TLU se Veiligheidskomitee kom in 1991 tot stand omdat die situasie op die platteland so ontwikkel het dat die landbouer nie meer ongestoord kon voortgaan met sy primêre taak van voedsel- en veselproduksie nie. 

13 000 boere woon op 6 Mei 1993 ’n massavergadering vir boere op Potchefstroom by. Ultimatums word aan die owerheid gestel oor wetgewing wat hulle rol as voedselprodusente sal benadeel.

Op 23 Maart 1995 word ’n spesiale Jongboer-konferensie by die Roodevallei Country Lodge naby Pretoria aangebied.

TLU bied in samewerking met die Landbouwerkgewersorganisasie op 17-18 Maart 1999 ’n internasionale kongres oor eiendomsreg in Pretoria aan.

TLU SA maak in 2005 konstruktiewe voorstelle aan die regering oor hoe grondoordrag op ekonomiese gronde gehanteer behoort te word. Die voorstelle sou voordelig vir alle rolspelers wees, maar dit is nie deur die regering aanvaar nie.

TLU SA en Solidariteit gee die boek Treurgrond uit. TLU SA se statistiek oor plaasaanvalle en -moorde sedert 1990 is hierin vervat. ’n Nuwe terrein vir die Pretoria Boeremark word in 2017 gekoop nadat dit sedert die vroeë negentigs uitsonderlike groei toon en dien as ’n boeremarkkonsep wat landswyd in verskillende vorms toegepas word.