Vir Gerhard Heinlein is boerdery nie bloot die verbouing van gewasse of die bestuur van vee nie. Dit is die verantwoordelikheid om ’n onderneming te bou wat aan honderde mense ’n bestaan bied en nog lank vir toekomstige geslagte sal voortbestaan.
Dié 33-jarige algemene bestuurder en direkteur van Sirkel-N-Landgoed in Limpopo is as een van die topdrie finaliste in TLU SA se Jongboer van die Jaar-kompetisie aangewys. Die wenner word op 2 September tydens TLU SA se Kongresdinee bekendgemaak.
Heinlein is deel van ’n groot, gediversifiseerde landbouonderneming wat aartappels, saadaartappels, uie, sitrus, tamaties, groenrissies en kuilvoer produseer. Die onderneming sluit ook ’n Bonsmara-stoet en wildvertakking in.
Hoewel elke vertakking sy eie uitdagings bied, vorm dit deel van een geïntegreerde onderneming waarin produksie, finansies, personeel, tegnologie, logistiek en bemarking voortdurend in balans gebring moet word.
“Vir my gaan boerdery nie net oor grond, vee en gewasse nie. Dit gaan oor mense, bestuur, verantwoordelikheid en die vermoë om elke dag beter te probeer doen,” sê Heinlein.
Van boerdery na landbouonderneming
Heinlein se liefde vir die plaas en landbou het reeds vroeg ontstaan. Hy beskryf boerdery as ’n leefwyse wat die geleentheid bied om waarde vir sy gesin, werknemers en die volgende geslag te skep.
“’n Mens kies nie noodwendig om ’n boer te word omdat dit maklik is nie. Jy kies dit omdat daar iets besonders is aan die verantwoordelikheid om grond te vat, iets daarmee te produseer en dit beter te probeer nalaat as wat jy dit ontvang het.”
Een van die grootste ontwikkelings wat hy in sy loopbaan beleef het, was die oorgang van ’n tradisionele boerdery na ’n professioneel bestuurde en gediversifiseerde landbouonderneming.
Namate die onderneming gegroei het, het sy eie verantwoordelikhede ook uitgebrei. Heinlein is vandag nie slegs by produksie betrokke nie, maar ook by strategie, finansiële bestuur, personeel, bemarking en die langtermynrigting van die onderneming.
Diversifikasie help om risiko oor verskillende produksievertakkings te versprei, maar skep terselfdertyd ’n komplekse bestuursomgewing. Daarom is goeie mense en doeltreffende bestuur volgens Heinlein ononderhandelbaar.
“’n Mens kan die beste grond, toerusting en tegnologie hê, maar sonder goeie mense en goeie bestuur gaan dit nie volhoubaar wees nie.”
Mense vorm die hart van die onderneming
Heinlein sê sy grootste trots lê nie noodwendig in ’n besonder goeie oes, nuwe toerusting of uitbreiding nie, maar in die aantal mense wie se lewens deur die boerdery geraak word.
“Wanneer jy besef dat daar honderde gesinne is wat ’n inkomste en toekoms het omdat hierdie onderneming werk, besef jy die groter verantwoordelikheid wat met boerdery gepaardgaan.”
Een van die belangrikste lesse wat hy as bestuurder moes leer, is dat niemand ’n onderneming van dié omvang alleen kan bestuur nie. Groei vereis dat ’n leier verantwoordelikheid delegeer, mense vertrou en ’n span bou wat die groter visie verstaan en saam dra.
“Ons werknemers is die boerdery se grootste bate. Jy kan toerusting vervang, maar jy kan nie maklik ervaring, lojaliteit en kennis vervang nie.”
Sy gesin se ondersteuning is net so belangrik. Volgens Heinlein verstaan hulle die opofferings wat die landbouleefwyse vereis en dat die verantwoordelikheid van ’n boerdery nie noodwendig aan die einde van ’n werksdag by die plaashek agtergelaat kan word nie.
Tegnologie moet waarde toevoeg
Moderne meganisasie, presisieboerdery, GPS-tegnologie, data en digitale bestuurstelsels speel reeds ’n belangrike rol by Sirkel-N-Landgoed. Vir Heinlein is tegnologie egter slegs waardevol wanneer dit die onderneming werklik verbeter.
“Die vraag is altyd: Maak dit ons beter?”
Die onderneming gebruik tegnologie om insette meer akkuraat toe te dien, vermorsing te verminder, toerusting beter te benut en ingeligte besluite te neem. Volhoubaarheid beteken vir Heinlein dat grond, water, kapitaal én mense verantwoordelik bestuur moet word sodat produksie oor die lang termyn kan voortgaan.
Hy glo jong boere sal toenemend anders moet dink om die uitdagings van duur grond, hoë insetkoste, beperkte kapitaal en groot produksierisiko’s die hoof te bied.
“Ons moet tegnologie gebruik, beter bestuur, meer waarde uit elke hektaar kry en bereid wees om nuwe geleenthede te benut.”
Erkenning vir ’n hele span
Om onder TLU SA se topdrie Jongboer van die Jaar-finaliste te wees, is vir Heinlein ‘n voorreg.
“Ek sien dit as erkenning vir die mense saam met wie ek elke dag werk en vir die onderneming waarvan ek deel is. Dit wys dat die harde werk, ontwikkeling en rigting waarin ons beweeg, raakgesien word.”
Sou hy op 2 September as wenner aangewys word, sal die erkenning volgens hom aan sy gesin, kollegas en elke werknemer in die onderneming behoort.
Dit sal ook ’n nuwe verantwoordelikheid meebring: om vir jong Suid-Afrikaners te wys dat landbou steeds ’n lewensvatbare en betekenisvolle toekoms bied.
“Ek wil hê jong mense moet na my kan kyk en sê: ‘Daar is ’n toekoms vir my in Suid-Afrikaanse landbou.’”
Heinlein se visie vir die volgende dekade is om Sirkel-N-Landgoed tot ’n nóg meer professionele, doeltreffende en tegnologiegedrewe onderneming te ontwikkel. Groei moet egter nooit bloot ter wille van uitbreiding plaasvind nie. Elke besluit moet winsgewendheid versterk en die onderneming se langtermynvoortbestaan verseker.
“Ek boer omdat ek glo ’n mens moet jou lewe aan iets groter as jouself wy. Ek boer omdat ek wil bou; ’n toekoms vir my gesin, ’n bestaan vir die mense wat saam met my werk en ’n nalatenskap vir die volgende geslag.”
