TLU SA wag in spanning om te sien of die regering op Woensdag 30 Oktober, met die eerste RNE-begroting binne Suid-Afrika se drasties veranderde politieke klimaat, werklik sal fokus op die bevordering van ekonomiese groei en die skepping van ‘n stabiele sake-omgewing.
“Geen begroting sal die gewenste effek hê as korrupsie nie eers uitgeroei word nie,” sê Bennie van Zyl, hoofbestuurder van TLU SA. “Om die staatskas aan te vul deur die belastingkerf te verhoog, bied ook nie ’n volhoubare oplossing nie – dit plaas bloot ’n verdere las op die reeds wankelende ekonomie.”
TLU SA onderstreep dat veiligheid en vertroue in die land se ekonomiese stelsel dringend aangespreek moet word. Daar is geen werklike groei moontlik sonder ’n omgewing waar die privaatsektor vryelik en vol vertroue kan belê nie. Die regering behoort die bestaande ESTA-wetgewing, wat ’n impak op die landbousektor het, te heroorweeg en die privaatsektor meer te ondersteun om landelike ontwikkeling te bevorder.
TLU SA beklemtoon dat die volharding in kaderontplooiing — ten koste van kundigheid — en die nalatigheid om korrupsie vas te vat, die volhoubaarheid van hierdie begroting verder ondermyn. “As die regering volhard met sy transformasieagenda en korrupsie nie aangespreek word nie, beteken enige begroting uiteindelik niks,” sê Van Zyl.
TLU SA sien uit om te sien of hierdie begroting werklik ‘n keerpunt sal wees — een wat uiteindelik die nodige veranderinge bring om Suid-Afrika se ekonomiese stabiliteit en vooruitgang te verseker.
