TLU SA en die gemeenskap rondom Dendron in Limpopo is verheug dat die hof die waarde van landbouers in die ekonomie erken.
Landdros Charlene Govender het die borgaansoek van die drie beskuldigdes in die aanval op Chris en Leonise Joubert van Dendron, verwerp, en hulle bly in aanhouding tot die verhoor begin. Die aanval het op 6 Augustus vanjaar plaasgevind en die beskuldigdes is in samewerking met die landelike veiligheidstrukture binne ses uur in hegtenis geneem. ‘n Verhoordatum is nog nie vasgestel nie.
Landdros Govender het in die Morebeng (voorheen Soekmekaar) Landdroshof melding gemaak van die geweldige ekonomiese inpak wat ‘n plaasaanval het, veral in Limpopo waar landbou die grootste direkte en indirekte werkgewer is.
Sy het verder verwys na die maatskaplike onrus wat plaasaanvalle op die gemeenskap in die algemeen het en politieke polarisasie wat dit meebring.
“Ons is oortuig dat die vreedsame optogte na die Soekmekaar Landdroshof en die optogte in Hartswater, Thabazimbi, en Naboomspruit deur die hof raakgesien is,” sê mnr. Drickus Botha, die streeksbestuurder van TLU SA se Noordstreek. “Ons is verheug dat hulle kennis neem van die pyn wat so ‘n aanval in ‘n gemeenskap veroorsaak. Ons wil elkeen wat ‘n optog bygewoon het bedank vir hulle steun. In Soekmekaar het dit werklik ‘n rol gespeel.”
Uitgereik deur: TLU SA
Datum: 27 Oktober 2020
Navrae: Mnr Drickus Botha, Streekbestuurder TLU SA Noord
Sel.: 082 774 9287
Mnr Henk van de Graaf, Voorsitter TLU SA Noord
Sel.: 076 563 3800
