Maak 'n bydrae tot TLU SA Traumafonds: Klik hier

Op die vooraand van die kredietgraderingsagentskap Moody’s se volgende besluit oor Suid-Afrika se ekonomiese status, is dit duidelik dat die ANC se beleid die land nou finaal tot in ‘n ekonomiese verknorsing gedwing het.

“Ongeag vele insette en konstruktiewe voorstelle wat oor soveel jare deur die oorgrote meerderheid kundige persone en instansies gemaak is, het die ANC steeds met sy beleid volhard,” sê Louis Meintjies, die President van TLU SA. “Nou is die harde werklikheid van dié beleid besig om te duur te raak vir die land. Die ANC is inderdaad besig om die toekoms van Suid-Afrika te vernietig.”

TLU SA se standpunt was nog altyd dat die reëls van die ekonomiese spel onveranderlik is. Wanneer politiek die spel betree, sal die ekonomie altyd die oorhand kry. Die prys van so ‘n stryd raak later te hoog wanneer ‘n onrealistiese beleidsomgewing geskep word.

Die basis van ‘n suksesvolle ekonomie begin by beleggersvertroue. Dit lei tot ‘n omgewing wat ekonomies gunstig is vir entrepreneurs om in besigheid te doen, met die doel om wins te maak. Die sukses van so ‘n situasie is wat uiteindelik ekonomiese groei teweeg bring.

“Die spreekwoordelike koek word dus groter gemaak en dit skep die kapasiteit om ernstige knelpunte op te los,” sê Meintjies.

Die ANC het sedert hulle die bewind van ‘n funksionerende land oorgeneem het, sleutelkundigheid uitgedryf met regstellende aksie, die infrastruktuur en meganismes wat nodig is om dit te laat werk geplunder en laat verval en sodoende gesorg dat Suid-Afrika vinnig op die afdraande pad na ‘n falende staat beweeg.

“Dit het dalk tyd geraak dat daar teruggekeer word na Ekonomie 101,” sê Meintjies. “Solank die ANC volhard in hierdie rigting sal daar beswaarlik ‘n uitkoms in die belang van die inwoners van die land kan wees.

“Weinig kapasiteit word geskep om die land na sukses te neem,” sê hy. “Die onvermoë om te regeer, gebrek aan kundigheid, korrupsie op elke vlak van die regering en blaamverplasing is maar enkele van die aspekte wat endemies geraak het aan die ANC-bewind.”

Wat is die enigste oplossing?

Die regering moet sy ekonomiese beleid hersien en sonder enige onduidelikheid verklaar dat privaat besitreg en die vryemarkstelsel die basis daarvan vorm.

Die ANC se inmenging met die ekonomiese proses kan geensins tot volhoubare sukses lei nie, die teendeel is eerder waar.

Staak die beleid van swart ekonomiese bemagtiging en fokus eerder op ekonomiese bemagtiging wat alle landsburgers die geleentheid sal gee om onbelemmerd die kundigheid toe te pas wat so dringend nodig is om die skip om te draai.

“Moody’s staan op die punt om Suid-Afrika weer af te gradeer,” meen Meintjies. “Iewers sal die resultate van die praat en beloftes oor die ekonomie deur die regering geëvalueer moet word teenoor dit wat in werklikheid gebeur.

“TLU SA skaar ons by soveel rasioneel-denkende ekonome wat oor tyd heen gewaarsku het dat dit wat die ANC implementeer, tesame met uitsprake oor onteiening sonder vergoeding en die nasionalisering van die Reserwebank nie ‘n boodskap van vertroue aan graderingsagentskappe stuur nie. Hoe kan dit dan anders as om Suid-Afrika se kredietgradering negatief te beïnvloed?

“Gaan Suid-Afrika se kiesers en veral die groeiende groep werkloses in aanloop tot die verkiesing op 8 Mei uiteindelik die nodige insig hê om te besef Suid-Afrika kan letterlik nie die ANC se beleid bekostig nie? Dit het eenvoudig te duur geraak.”