TLU SA vind dit uiters verdag dat Eskom skielik beurtkrag instel, slegs dae nadat die elektrisiteitsverskaffer ‘n hofsaak teen Nersa, die reguleerder, aanhangig gemaak het omdat die entiteit nie tevrede was met die tariefverhogings wat goedgekeur is nie.
“Dit wil byna voorkom of hier sprake is van ‘n subtiele afpersing, soos dit in die verlede ook al meermale plaasgevind het as Eskom dit oneens was met Nersa se besluite,” sê mnr. Louis Meintjes, die president van TLU SA. “Die verbruiker begin al die indruk kry dat as Eskom nie sy sin kry nie, daar beurtkrag ingestel word as ‘n soort hefboom.
“Die verduideliking dat daar al van Saterdag af probleme is, maar die land word eers Woensdag onverhoeds betrap, sonder enige vooraf waarskuwing, is net so onaanvaarbaar “ sê hy. “Baie boere moet in hierdie droogtetoestande en warm temperature hulle besproeiing behoorlik skeduleer, sodat hulle voedsel vir die land se tafels kan voorsien. Hulle is die reg van behoorlike beplanning ontneem deur Eskom se laksheid en ongevoelige optrede. Ek wil boere wat skade as gevolg hiervan ly, vra om TLU SA te kontak, sodat ons kan kyk na gepaste optrede om die skade te verhaal.
“Eskom het wel geld vir duur hofsake teen Nersa, maar kan nie noodsaaklike instandhouding bekostig nie. Dit is totaal onaanvaarbaar, en Eskom se bedryfshoof se verskoning aan die land vir die beurtkrag is nie die papier werd waarop dit staan nie,” sê mnr Meintjes.
