Die regering is weereens besig om landbou te faal deur die Vrystaatse en Noord-Kaapse brande – waar weiding, diere en opstalle vernietig is – nie tot ‘n ramp te verklaar nie.
Die parlement se Portefeuljekomitee vir Landbou, Grondhervorming en Landelike Ontwikkeling het reeds gister ‘n versoek gerig aan minister Thoko Didiza om die gebiede in die Vrystaat en Noord-Kaap wat deur brande verwoes is, tot rampgebiede te verklaar. Die VF+ het ‘n soortgelyke versoek gerig.
“Wanneer die regering landbouers nodig het, soos gedurende Covid-19, is ons net die beste, maar wanneer ons die regering se hulp nodig het, is daar doodse stilte,” sê mnr. Bertus van der Westhuizen, die voorsitter van TLU SA in die Vrystaat. “Landbou is reeds gewoond hieraan en daarom is dit geen verrassing dat boere en ondersteuners van regoor die land self inspring om die boere in die Vrystaat en Noord-Kaap by te staan nie.”
TLU SA het reeds begin om die bydraes en fondse wat instroom na die boere in nood te kanaliseer.
Boere het laat weet dat die volgende nou benodig word:
- Breëspektrum-antibiotika en ander veemedisyne;
- Energielekke soos melassemeel en/of lekblokke;
- Gras, oesreste, mielies en enige ruvoer.
- Enige weiding wat uitgespaar is en afgestaan kan word;
- Pale, draad en omheiningsmateriaal om beskadigde infrastruktuur te probeer herstel;
- Plastiekpyp vir watervoorsiening;
- Brandstof en vervoer vir skenkings; en
- Fondse om die bostaande te voorsien.
Enige finansiële bydraes kan direk in TLU SA se Traumafonds-rekening betaal word.
“Ons sal voortgaan om boere, of hulle lede is of nie, te ondersteun wanneer hulle dit nodig het,” sê mnr. Van der Westhuizen. “Ons belangrikste taak is om te verseker dat boere veilig en volhoubaar op hulle grond bly om in die landbouvraag van die land te voorsien. Dit sal ons doen.”
Volg hierdie skakel vir meer inligting oor die hulp-veldtog: https://www.tlu.co.za/vrystaat-brande-traumafonds/.
Uitgereik deur: TLU SA
Datum: 21 Oktober 2020
Navrae: Mnr Bertus van der Westhuizen, Voorsitter TLU SA Vrystaat
Sel.: 082 571 5180
Mnr Bennie van Zyl, Hoofbestuurder TLU SA,
Sel.: 082 466 4470