Die TLU SA Sentraal Streek het op 10 April 2025 sy jaarlikse konferensie net buite Pretoria aangebied. Die geleentheid het produsente en ander belangstellendes uit die landboubedryf bymekaar gebring vir ’n dag van relevante gesprekke oor kwessies wat die boerderygemeenskap direk raak.
Die konferensie is geopen deur Ds. Paul van den Berg van die Gereformeerde Kerk Cullinan, wat die deelnemers met ‘n inspirerende gebed en boodskap verwelkom het. Daarna het Henri Combrink, streekvoorsitter van TLU SA Sentraal Streek, die program gedeel en die dag se gesprekke geloods.
Ons het ‘n baie insiggewende konferensie gehad,” sê Henri Combrink, streekvoorsitter. “Die samewerking en deelname van diegene wat daar was, het dit ’n groot sukses gemaak.”
Die dag het ‘n waardevolle insig in landbouprobleme gebied, te danke aan ‘n verskeidenheid van kundiges. Dr. Johan Malherbe van die Landbounavorsingsraad het ’n gedetailleerde blik op die impak van droogtesiklusse en weermodelle gedeel, en het met die deelnemers ’n diepgaande gesprek gevoer oor hoe boere beplanning kan aanpas om beter voor te berei op die uitdagings wat die klimaat inhou.
Paul Avenant van die departement van landbou het deelnemers op ‘n reis geneem deur die uitdagings van indringerplante en bosverdigting. Hy het praktiese oplossings gebied vir die bestuur van indringerplante, en verduidelik hoe ekologiese suksessie ‘n integrale deel van die landboubestuur moet wees om volhoubare praktyke te verseker.
Hanlie Kroese van Santam het daarna gefokus op die belangrikheid van veldbrandversekering in ‘n tyd waar risiko’s vir boere toenemend styg. Sy het nie net die praktiese aspekte van versekering gedeel nie, maar ook die strategieë wat boere kan implementeer om hul besighede teen veldbrande te beskerm.
Na elke aanbieding is deelnemers uitgedaag om vrae te vra, wat waardevolle en aktiewe gesprekke en terugvoer gelewer het.
Die dag is afgesluit met gelukkige trekkings en bedankings deur Combrink, gevolg deur ’n ete en gesellige samesyn.
