Maak 'n bydrae tot TLU SA Traumafonds: Klik hier

TLU SA het vandag ‘n versoek gerig aan President Cyril Ramaphosa om ‘n regterlike kommissie aan te stel wat die onwettige handel in sigarette en alle betrokke rolspelers moet ondersoek.

 

Sedert die skielike ommekeer in die verbod op tabakprodukte gedurende die inperking, word daar wyd in die media en op sosiale media platforms bespiegel oor die moontlike betrokkenheid van besluitnemers in die Bevelsraad in die onwettige handel van sigarette.

 

“Dit is in belang van Suid-Afrika en die betrokke persone wat onder verdenking geplaas word, dat ‘n dringende deurtastende ondersoek geloods en die hele situasie tot op die been oopgevlek word,” sê mnr. Louis Meintjes, die president van TLU SA. “Die verbod op die aankoop van tabakprodukte dien geen doel aangesien rokers hulle nou net tot die swartmark wend. Die  enigste persone wat uit die situasie voordeel trek, is diegene wat betrokke is by die onwettige handel daarvan.”

 

Vanuit ‘n landbou-oogpunt het die verbod op die verkoop op tabakprodukte eerstens ‘n wesentlike invloed op tabakboere, maar verder ook op elke ander rolspeler in die waardeketting. Die omvang van die verlies aan aksynsbelasting as gevolg van die verbod op tabakverkope is geweldig. Dit terwyl die fiskus nou elke sent moontlik nodig het om die ekonomie te stabiliseer.

 

“Dit is die regering se verantwoordelikheid om dié ernstige aantygings volledig te ondersoek en aan Suid-Afrika verslag te doen,” sê mnr. Meintjes. “Dit is noodsaaklik om op te tree wanneer die integriteit van saakmakend rolspelers in die regering in gedrang is.

 

“Die regering se rekord van voetesleep wanneer dit kom by die ondersoek van korrupsie in eie geledere, skep egter die beeld van ‘n regering wat korrupsie kondoneer,” sê hy. “Kom ons hoop dat dit hierdie keer nie die geval sal wees nie.”

 

 

Uitgereik deur:          TLU SA

 

Datum:                       27 Mei 2020

 

Navrae:                       Mnr Louis Meintjes, President TLU SA,

                                    Sel.: 082 461 7262

 

Mnr Bennie van Zyl, Hoofbestuurder TLU SA,

                                    Sel.: 082 466 4470