TLU SA spreek sy opregte gelukwensing en steun uit aan Prof. Andries Raath, streekbestuurder van TLU SA Vrystaat, met sy verkiesing as Voorsitter van die SAPD se Vrystaat Veediefstalforum, ’n liggaam wat daarop gemik is om strategiese samewerking tussen die SAPD, georganiseerde landbou en ander rolspelers te bevorder in die stryd teen veediefstal.
Prof. Raath beskryf die aanstelling as ’n roeping en sê dat dit vir hom persoonlik belangrik is om nou gewig in te gooi in hierdie kritieke tyd vir landbou. “Ons is nie by TLU SA betrokke om ons tyd te verwyl nie, maar om ons lede op hulle plase te hou, veilig, winsgewend en volhoubaar, terwyl ons ook die breër gemeenskap dien,” sê hy.
Veediefstal het ’n verwoestende impak op die volhoubaarheid van kommersiële boerdery, veral in provinsies soos die Vrystaat waar die rooivleisbedryf ‘n kernrol in voedselvoorsiening en werkskepping speel. Maandelikse verliese weens veediefstal in die provinsie wissel soms tussen R5 miljoen en R10 miljoen. “Ons kan eenvoudig nie bekostig dat hierdie misdaadpatroon voortduur nie,” sê prof. Raath.
Hy beklemtoon dat die Veediefstalforum se doel is om ’n doeltreffende netwerk van voorkoming te vestig deur beter samewerking tussen die SAPD, staatsinstellings en die privaat sektor. “Ons visie is duidelik: meer effektiwiteit, beter uitkomste en ’n geïntegreerde strategie wat werk. Maar dit vra kollektiewe betrokkenheid, niemand kan alleen hierdie uitdaging oorwin nie.”
Een van die grootste struikelblokke in die bekamping van veediefstal is die onderrapportering van voorvalle. “Wanneer boere misdaad nie konsekwent aanmeld nie, lyk die amptelike statistiek beter as wat dit is, en dit beïnvloed die toekenning van hulpbronne. Ons pleit dus dringend by produsente om alles aan te meld sodat die volle impak van veediefstal op die sektor sigbaar is.”
Prof. Raath sluit af: “Hierdie werk is deel van koninkrykswerk. Die stryd teen veediefstal is nie net ‘n landbou- of veiligheidsaangeleentheid nie, dit gaan oor geregtigheid, verantwoordelikheid en diens aan ons gemeenskappe. Ek is dankbaar vir die geleentheid om op hierdie manier diensbaar te wees.”
TLU SA spreek sy volle vertroue uit in prof. Raath se leiding en sien uit na die strategiese waarde wat hy in hierdie belangrike rol sal toevoeg tot georganiseerde landbou en die veiligheid van boere.
