TLU SA Limpopo verwelkom provinsiale premier dr. Phophi Ramathuba se versoek aan president Cyril Ramaphosa dat Limpopo as ’n rampgebied verklaar word.Hierdie versoek volg ná ’n reeks verwoestende storms wat onlangs dele van Limpopo getref het en groot skade veroorsaak het. Die storms het talle strukture beskadig, insluitend dakke wat van huise en kerke afgewaai het, asook elektriese pale, drade en waterpype wat herstel benodig.
“Ons ondersteun die premier ten volle in haar pleidooi,” sê Fanie Havinga, voorsitter van TLU SA Limpopo. “Ons glo egter dat die fokus verder moet strek as slegs die onlangse stormskade.”
Sedert Julie vanjaar is TLU SA Limpopo in gesprek met die provinsiale rampbestuurspan oor die verwoestende swartryp wat drie keer in die eerste week van Julie toegeslaan het en geweldige skade aan gewasse soos aartappels, bessies, sitrus, avokado’s, papajas en neute aangerig het. Kort daarna het verwoestende brande die reeds bestaande skade deur swartryp verder vergroot.
“Ons pleit sedertdien dat Limpopo as rampgebied verklaar word sodat noodsaaklike verligting aan kommersiële en opkomende boere gebied kan word, aangesien die hersteltyd moeilik en tydsaam is. Ten spyte van aanvanklik goeie samewerking van dr. Makananisa, hoof van rampbestuur, en ons deelname aan ’n nasionale vergadering oor die saak, is daar steeds geen noemenswaardige optrede nie,” voeg Havinga by.
In haar voorlegging aan die president het die premier ook die knellende droogte wat die streek tans ervaar, uitgelig en die onontbeerlike rol van landbou in Limpopo beklemtoon.
“Om hierdie rede is dit noodsaaklik dat ’n ramptoestand so gou moontlik afgekondig word, wat nie net die stormskade insluit nie, maar ook die vernietiging wat deur swartryp en brande veroorsaak is, en waarskynlik groter was as die skade weens die onlangse storms. Ons staan gereed om die premier namens die provinsie se kommersiële boere te ondersteun,” sluit Havinga af.
