Die Vioolsdrif grenspos, een van Suid Afrika se belangrikste grensposte, geleë langs die Oranjerivier aan die grens met Namibië, is reeds langer as ’n maand sonder enige watervoorsiening. Hierdie ernstige diensleweringstekort wek groot kommer oor basiese menseregte, gesondheid, werksomstandighede en die funksionaliteit van hierdie strategiese fasiliteit.
Ten spyte van die daaglikse teenwoordigheid van grensbeheer en doeane-amptenare, is daar geen betroubare toegang tot water nie nie vir die grenspos self, die personeel of omliggende omgewing nie. Die volgehoue tekort stel nie net mense se gesondheid in gevaar nie, maar belemmer ook die algehele doeltreffendheid van grensbeheer.
“Ons praat hier van ’n internasionale grenspos wat ’n spilpunt is vir handel en toerisme tussen Suid Afrika en Namibië,” sê ’n bekommerde bron. “Om werkende personeel vir langer as vier weke sonder water te laat funksioneer, is ’n blatante verontagsaming van basiese diensverpligtinge. Dit is nie bloot nalatigheid nie, dit is ’n skending van verantwoordelikheid.”
Die Vioolsdrif grenspos is ’n sleutelrolspeler in bilaterale handelsvloei en grenssamewerking. Dit dien ook as toegang tot die N7 hoofroete tussen Kaapstad en Windhoek. Die afwesigheid van ’n basiese noodsaak soos water by so ’n strategiese punt plaas ernstige druk op reeds kwesbare infrastruktuur in afgeleë gebiede.
TLU SA Noord Kaap, namens georganiseerde landbou in die streek, spreek sy ernstige teleurstelling en kommer uit oor die voortdurende versuim van betrokke owerhede om hierdie probleem aan te spreek. Grenspersoneel ly onder hierdie omstandighede en die situasie is onvolhoubaar.
Ons doen ’n dringende beroep op die Departement van Water en Sanitasie, die Departement van Openbare Werke en Infrastruktuur, en plaaslike en provinsiale owerhede om onmiddellik in te gryp.
“Die status quo is onaanvaarbaar. Geen werknemer behoort sonder basiese geriewe soos water hul pligte te verrig nie, en die publiek verdien deursigtigheid en verantwoordbaarheid. Die tyd vir aksie is nou.
Foto: Pavel Špindler
