In samewerking met Manitou, Santam en CMH Ford Hatfield
(Luister gerus na ‘n lekker onderhoud met Danie oor boer, kinders en om ‘n kantoor met sy vrou te deel)
Danie Bester van Balfour in Mpumalanga is die wenner van TLU SA se Jongboerkompetisie 2020 in ondersteuning met Manitou, Santam en CMH Ford Hatfield.
Die beoordelaars was baie beïndruk met Danie se gebruik van tegnologie en veral die internasionale skakeling en navorsing oor sojaboontjies. Hy is ‘n boer wat nie net aanpas by die hulpbronne tot sy beskikking nie, maar ook die hulpbronne uitbrei en verbeter. Dit is presies die tipe vindingrykheid waarna TLU SA soek onder jong boere.
Danie (35) het na skool op die Potchefstroomse Landbou Kollege studeer. Soos die meeste kinders wat op ‘n plaas grootgeword het, boer Danie al vandat hy ‘n klein seuntjie was. Hy het toe ook amptelik na skool begin boer, en is die afgelope 12 jaar op Rietbult by Balfour in Mpumalanga. Hy hanteer die graangewasse wat bestaan uit mielies en soja’s terwyl sy pa, wat saam met hom boer, die beesboerdery hanteer.
Hy is getroud met die neurofisioloog Janet en hulle het twee kinders, Dawie en Janike.
Afgesien van die spogtitel – Jongboer van die Jaar – ontvang Danie die volgende van ons borge:
- ‘n Oorsese reis na die Manitou fabriek in Frankryk;
- R25 000 kontant van Santam; en
- R10 000 kontant van CMH Kempster Ford Hatfield.
CT van der Merwe (35) van Dendron in Limpopo is as die naaswenner aangewys. Hy boer die afgelope 13 jaar op Al3 Boerdery met aartappels, botterskorsies, uie, beeste en het onlangs ook dragon fruit by hulle produkte gevoeg. CT ontvang R15 000 van Santam.
Janis Terblanche (32) van Marble Hall in Limpopo ontvang met sy derde plek R10 000 van Santam. Janis boer al vir tien jaar. Hy het die Janis Terblanche Boerdery ses jaar gelede gekoop en boer voltyds met druiwe.
TLU SA bedank die borge Manitou, Santam en CMH Ford Hatfield vir die belangrike belegging wat hulle in jong boere maak.
