Die afgelope week het rye trekkers die paaie in Duitsland versper en chaos in stede en hoofpyne vir pendelaars veroorsaak. Maar dit is niks nuuts nie. In die laaste jare het boere in Wes-Europa met toenemende vurigheid teen beleide gestry wat volgens hulle doeltreffende boerderypraktyke aan bande lê.
TLU SA erken die standpunt wat regoor die wêreld ingeneem word ter ondersteuning van voedselproduserende boere. Elke land staar sy eie uitdagings wat baie boere verhinder om volhoubaar te boer in die gesig.
In Suid-Afrika ondervind ons ‘n tekort aan elektrisiteit, onderbenutte hawens, en verwaarloosde paaie wat dit vir boere moeilik maak om produkte aan verbruikers te lewer. ‘n Ekonomie wat kwyn as gevolg van die regerende party se wanbestuur, maak volhoubare boerdery amper onmoontlik.
Dit is tyd vir regerings regoor die wêreld om te besef dat wanneer boere, diegene wat voedsel vir hul burgers produseer, van hul plase verwyder word, die land en al sy mense in gevaar is. Daar is meer as 8 miljard mense in die wêreld wat almal afhanklik is van die voedsel wat deur ongeveer 570 miljoen plase produseer word, m.a.w. elke plaas moet vir sowat 140 mense sorg. In Suid-Afrika is die syfer omtrent 10 keer hoër – hier voorsien elke kommersiële boer kos vir meer as 1400 mense.
Die wêreld se belangrikste bate is sy produserende boere.
Dit is tyd dat almal, veral regerings, verstaan dat sonder suksesvolle boere daar geen kos, geen ekonomiese groei, en geen toekoms is nie. Volhoubare produksiepraktyke en deurlopende navorsing is onontbeerlik vir die toekoms van boerdery.
Vandag bring ons dank aan elke individu en organisasie wat boere ondersteun en bemagtig. Dankie dat julle opstaan vir die mense wat seker maak dat daar kos vir ons gesinne is. TLU SA stap al 127 jaar hierdie pad en sal voortgaan op hierdie reis. Laat ons hande vat om die toekoms van landbou oor die wêreld heen te verseker.
