TLU SA betreur dit dat, ten spyte van verskeie versoeke aan die onderskeie rolspelers in die waardeketting, dié organisasie die geleentheid ontneem is om bydrae te lewer tot die daarstel van ’n ekonomiese landbouplan tot voordeel van alle boere in Suid-Afrika.
Só praat mnr. Bennie van Zyl, TLU SA Hoofbestuurder ná die ondertekening van die omstrede AAMP – die regerings se nuutste landbou-meesterplan.
“Thoko Didiza, minister van landbou, het groot aandag aan die afteken van die AAMP gegee tydens landbou se begrotingsdebat. Dit is egter na ons oordeel gestoomroller aangesien ondernemings nie nagekom is teenoor ons nie. Transformasie speel ’n kern fokuspunt, maar ná ’n jaar kry TLU SA steeds geen antwoorde nie oor wat dit behels. Vennootskappe word voorop gestel. Dit kan egter net plaasvind tussen partye wat beide bydrae tot die verhouding. Dit moet vrywillige keuse wees,” het mnr. Van Zyl gesê.
“Landbou is ’n ekonomiese proses en aan die einde van die dag moet die ekonomiese markkrag beginsel die bepalende faktor vir volhoubaarheid wees. Dit wil voorkom as die rolspelers heeltemal hiervan vergeet het of hulle eenvoudig nie hieraan steur nie.
“As dit by grond kom, moet daar liewer gefokus word op grond wat reeds in die mark is sowel as al die grond wat die regering reeds het. Dit moet aan gegee word aan nuwe toetreders wat bereid is om die verantwoordelikheid te aanvaar en hulle ’n billike geleentheid gee om te kan boer. Deur net grond beskikbaar te stel, plaas persone in armoede slagysters.”
Mnr. Van Zyl het ook verwys na die regering se vorige pogings vir meesterplanne vir landbou.
“Oor die jare heen het verskeie landbou-planne die lig gesien wat telkens nie suksesvol was nie. Volgens TLU SA is die rede elke keer dat daar meer politiek en ideologie in die planne vervat is instede van ekonomiese planne. Met die AAMP kan niemand regtig sê wat die transformasie – waarna deurentyd verwys word – alles insluit nie, maar wat tot dusver ervaar was, is ’n sterk sosialisties- en kommunisties gedrewe agenda. Daar moet ook kennis geneem word van besprekingsdokumente wat tydens die ANC se konferensie oor besluit gaan word dat wit boere bv. grond moet skenk sowel as punte soos onteiening sonder vergoeding.
“Die ideologiese aanslag op ons boere – wat TLU SA beskou as die grootste bate in die land – is onnodig. Daar is voldoende plase wat in die mark kom wat nuwe toetreders kan opraap en gaan boer en indien hulle die verantwoordelikheid wat dit verg om te boer aanvaar, sal die markkragte soos met enige ander boer bepaal of hulle suksesvol gaan wees. Heelwat meer behoort eintlik hieroor gesê te word. TLU SA is baie bekommerd dat hieruit oor tyd heen dinge kan ontsluit wat verdere onrealistiese en onnodige druk op landbou gaan plaas.”
TLU SA sal meer volledig reageer sodra die bepaalde toedelings van finansies bestudeer is.