Die Schildpaddop Selfbehoudkamp van die Afrikaner Volkskultuur beweging het sy ontstaan gehad op die plaas Schildpaddop in 1999 in die Thabazimbi-distrik waar ons Hoofbestuurder geboer het. Met die hulp van ’n groot klomp rolspelers is daar baie doelmatige fasiliteite daar opgerig en is daar vir verskeie jare in heerlike Bosveld-omstandighede vir ons Afrikaner Jeug baie goeie selfbehoud opleiding gegee.
Met die verkoop van die grond het die nuwe eienaar op daardie stadium omgedraai op sy woord en moes die kamp op baie kort kennisgewing skuif. Groot dank vir George Bester sowel as Peet du Bruyn wat opeenvolgend hul plase beskikbaar gestel het om die kamp gedurende die April vakansie vir die een geleentheid per jaar moontlik te maak. Weens die verkoop van die grond moet ons na ’n nuwe terrein soek.
Waar ons jeug tradisioneel baie blootstelling aan die plaas- en natuurlewe gehad het met oupas en oumas wat geboer het, is ons jeug deesdae baie minder blootgestel aan die plaaslewe en is dit altyd ’n voorreg om vir die Afrikaner Jeug bepaalde blootstelling in die verband te kan bied. Daar word verneem of enige boer, verkieslik in ’n Bosveld-omgewing, bereid sou wees dat ons die kamp daar by hulle op die plaas kan kom aanbied. Indien daar reeds bepaalde fasiliteite is, sal dit sake baie vergemaklik. Indien enige iemand bereidwilligheid oorweeg, sal ons dit waardeer indien jy Bennie van Zyl by 082 466 4470 kontak.
