TLU SA se versoek aan die Minister van Finansies, mnr. Enoch Godonwana, met die oog op Donderdag se mediumtermynbegroting is om die landbouprodusente as Suid-Afrika se grootste bate te sien.
Mnr. Bennie van Zyl, TLU SA se hoofbestuurder, sê: “Dit is belangrik om ’n gunstige omgewing te skep om seker te maak hulle (landbouprodusente) kan aanhou produseer.”
Hy het na die buitensporige styging van insetkostes verwys wat boere se winsgewendheid onderdruk plaas.
“Dit beteken boere moet keuses maak om in produkte te bly wat tot tekorte in sommige kommoditeite kan lei. ’n Groot woord van dank moet teenoor die landbouwaardeketting uitgespreek word wat in die laaste tyd onder ongunstige omstandighede steeds voldoende voedsel produseer om gesonde en bekostigbare voedsel op verbruikers se tafel te plaas.”
Suid-Afrika se ekonomie word tans onder andere gekenmerk deur rommelstatus, werkloosheid, lae ekonomiese groei, onaanvaarbare vlakke van misdaad en wantroue in die regering.
“Die prys van kader-ontplooiing is te hoog weens die gebrek aan kundigheid. Die storting van bykomende finansiële ondersteuning is inderdaad net wat dit sê, naamlik storting, maar ongelukkig in bodemlose putte.”
Mnr. Van Zyl sê die landbou wil hê die regering moet beter voorsiening maak vir rampe ten einde die kommersiële boere in produksie te behou.
Dit is ’n ope vraag of die ideologiese omgewing wat die ANC nastreef hom enigsins kan leen tot die regte dinge wat behoort te gebeur.
“Daar moet ernstig besin word of daar voortgestu kan word met die huidige benadering. Die begroting kan net tot sy reg kom as ’n aantal kwessies aangespreek word, naamlik uitroei van korrupsie, staak kader-ontplooiing en stel kundiges aan, besnoei uitgawes en neem met elke besluit die impak van ekonomiese groei in ag.”
