Saai en TLU SA is dankbaar dat Agri-SA ook tot die Moladora-saak toegetree het en nou ʼn finansiële bydrae tot die koste van die saak gaan maak. Die saak is tot dusver deur Agri-NW, Mpumalanga Landbou, TLU SA en Saai gedryf omdat dit verdoemende gevolge vir eiendomsreg en potensieel vir elke boer kan hê.
Die saak handel oor ‘n omstrede uitspraak ten gunste van grondbesetters wat vee sonder toestemming op ‘n plaas aangehou het. Dié uitspraak kan ‘n presedent skep wat ernstige implikasies vir private eiendomsreg inhou.
“Gegewe die omvattende koste verbonde aan die appèlsaak, is daar onder die oorspronklike bydraers besluit om hulpbronne, kundigheid en kapasiteit te verpoel om die grootste moontlike impak op die uitkoms van die saak te hê,” sê Bennie van Zyl hoofbestuurder van TLU SA. “TLU SA het vroeg reeds ʼn finansiële bydrae gemaak en ooreengekom om sy regspan se insette by Saai te gee, wat as ʼn vriend van die hof toetree.”
“Groter samewerking om te verseker dat die regte ekonomiese beginsels in belang van landbou geïmplementeer word, is van oorlewingsbelang, en as soortgelyke bydraes ook op die terreine van plaasveiligheid, misadaadbekamping in die platteland, optrede teen bedrog en staatskaping in grondhervorming en dienslewering gemaak kan word, sal dit ʼn nuwe era in die bevordering van landboubelange inlui,” sê Theo de Jager, voorsitter van Saai.
TLU SA en Saai hoop dat ander landbouorganisasies en -rolspelers ook soos Agri SA sal besef hoe belangrik dit is om die organisasies wat van die begin af betrokke was, in die saak te versterk tot die voordeel van landbou.
