Maak 'n bydrae tot TLU SA Traumafonds: Klik hier

Dit is vir TLU SA duidelik dat misdadigers hulle nie steur aan die inperkingsregulasies nie, en boere is toenemend die slagoffer daarvan.

 

Daar is landwyd ‘n oënskynlike toename in diefstal van landbouprodukte, soos oes- en veediefstal, terwyl kabeldiefstal ook in sekere areas aan die toeneem is en boere se produksie frustreer.

 

“Wat ons verder bekommer is die feit dat plaaswagte en GPF’s uitdruklik deur die minister van polisie verbied is om met hulle normale patrollies en misdaadvoorkoming voort te gaan,” sê TLU SA se Noordstreek voorsitter, mnr. Henk van de Graaf. “Waar die polisie tans fokus op ander sake, beteken dit dat die landelike gebiede nou onbeveilig is. Misdadigers weet dit en maak misbruik van die situasie.”

 

TLU SA is ook bekommerd oor die polisie se fokus op onder andere mense wat drank- of tabakprodukte wil aanskaf en hulle selfs onredelik hardhandig vervolg, terwyl daar bykans geen polisiëring is van diewe wat voedselsekerheid bedreig nie.

 

Boere word aanbeveel om die waaksaamheid op hulle eie plase te verhoog, maar die krag in plaaswagte lê juis in die onderlinge samewerking, doeltreffende kommunikasie, die dek van groter gebiede as net die eie plaas, en deurdat openbare paaie, wat dikwels die toegangs- en wegkomroetes van misdadigers is, ook gepatrolleer word. Nou is hierdie gebiede verlate, wat die landelike diewe uiteraard verwelkom.

 

“Na die geweldige droogte en die landboubedryf se verlamming as gevolg van die bek- en klouseer, kan boere nie nou nog onbeheerste diefstal van hulle produkte bekostig omdat die minister van polisie irrasionele besluite neem nie,” sê mnr. Van de Graaf.

 

“Boere begin hulle plase nou as rampgebiede beskou, en gaan hulle eie noodmaatreëls instel teen enige verdagte betreding of beweging op die plaas,” waarsku hy. “Dit gaan tot niemand se voordeel wees nie, en ons doen ‘n beroep op die provinsiale regering om die saak dringend met die nasionale regering op te neem ten einde ‘n spoedige hersiening van bestaande opdragte in die verband te kry. Ons kan nie nog drie weke so aangaan nie.”

 

 

Uitgereik deur:          TLU SA

 

Datum:                       14 April 2020

 

Navrae:                       Mnr Henk van de Graaf, Voorsitter: TLU SA Noord,

                                    Sel.: 076 563 3800