TLU SA neem kennis van die inhegtenisname van ’n 34-jarige polisielid, verbonde aan die Standerton Veediefstaleenheid, op aanklag van betrokkenheid by veediefstal ter waarde van meer as R450 000. Hierdie arrestasie volg ná maande se ondersoekwerk, en word verbind met veediefstal in die Standerton-, Perdekop- en Greylingstad-gebied.
Dit is besonder ontstellend dat ’n polisielid wat juis moes help om veediefstal te bekamp, vermoedelik sy posisie misbruik het om homself te verryk, meen TLU SA.
“Hierdie arrestasie wys duidelik dat geen persoon bo die reg verhewe is nie. Ons verwelkom die inhegtenisname en ondersteun die petisie dat borg teen hierdie verdagte teengestaan word,” sê Henry Geldenhuys, president van TLU SA.
TLU SA spreek sy waardering uit teenoor adjudant Hennie Koch vir sy jarelange, onbaatsugtige toewyding om veediefstal die stryd aan te sê. “Dankie, adj. Koch, vir die maande se harde werk en deursettingsvermoë. Jy stel ’n voorbeeld van wat toegewyde polisiewerk behoort te wees. Ons is werklik dankbaar vir jou puik werk,” sê Geldenhuys.
Ook boere soos Celia Beukes van die Chrissiesmeer-distrik, wat saam met adj. Koch in ondersoekwerk en inligting deelneem, speel ’n onmisbare rol. TLU SA glo dat hierdie samewerking tussen toegewyde boere en eerlike polisielede nie net resultate oplewer nie, maar ook help om gemeenskappe se vertroue in die polisie ’n broodnodige hupstoot te gee.
Ronnie Schilling, TLU SA se Oosstreek-bestuurder, sluit hierby aan: “Hierdie arrestasie bevestig dat volgehoue druk en deeglike ondersoekwerk resultate lewer. Dit is ’n belangrike stap in die regte rigting om boere se vertroue te versterk dat veediefstal nie ongestraf sal voortgaan nie.”
Volgens TLU SA toon hierdie geval dat die misbruik van gesagsposisies groot skade aan gemeenskappe en die polisie se beeld berokken, maar dat regverdige optrede en toegewyde ondersoekbeamptes die vertroue weer kan herstel.
Die verdagte verskyn reeds in die plaaslike hof, terwyl die saak voortgesit word.
