TLU SA vind die voorgestelde veranderinge aan die Wapenwet nie net absurd nie, maar ook teenstrydig met die Suid-Afrikaanse grondwet.
Die Grondwet van Suid-Afrika bepaal in die Handves van Menseregte dat elke persoon die reg tot ‘n veilige omgewing het. Aangesien die regering klaaglik daarin faal om Suid-Afrikaners se veiligheid te waarborg, moet elke persoon die reg hê om daardie beskerming self oor te neem.
“Suid-Afrikaners is soos dinge staan, reeds soos voëls op ‘n tak wat links en regs moet koes vir skote wat afgevuur word, letterlik en figuurlik,” sê mnr. Henry Geldenhuys, die president van TLU SA. “Solank as wat misdaad in die land hoogty vier en die regering nie die veiligheid van elke Suid-Afrikaner kan waarborg nie, is die voorstel dat vuurwapens nie vir selfverdediging gebruik mag word nie belaglik.
“Om te verwag dat boere, wat verafgeleë en afgesonderd is, hulleself nie mag beskerm nie, is ondenkbaar.”
Die nuutste misdaadstatistiek toon ‘n styging in aanvalle en moord met plaasaanvalle op 103 en plaasmoorde op 16 net vanjaar. Dit is algemene kennis dat die polisie nie genoeg werkende voertuie, uniforms of selfs toerusting het om hulle werk na behore uit te voer nie. Sommige polisiekantore se telefone word eenvoudig nie geantwoord nie. Sommige polisielede is deel van die korrupsie wat die diens verswak. Die minister van polisie, Bheki Cele is die hoofoorsaak dat die land sit met ‘n agterstand in die verwerking van DNS-monsters en vuurwapenaansoeke.
“Hoekom spandeer die regering nie eerder tyd, geld en hulpbronne daaraan om eers die onwettige wapens in die hande van bendelede en ander misdadigers te verwyder in plaas van om wettige vuurwapeneienaars te teiken nie?” vra mnr. Geldenhuys. “Hoekom word daar nie tyd en geld spandeer aan sigbare polisiëring, hulpbronbestuur en die beskerming van boere nie?”
TLU SA sal in die geval waar sulke voorstelle deurgevoer word, daarop aandring dat die regering finansieel aanspreeklik gehou word vir enige uitgawes wat spruit uit ‘n geweldsmisdaad indien die slagoffers of naasbestaandes nie in selfverdediging kon optree nie.
“Hierdie voorstelle sal geensins die misdaadprobleem in Suid-Afrika oplos nie,” sê mnr. Geldenhuys. “Dit sal net daartoe lei dat vuurwapeneienaars oor die gebruik van vuurwapens lieg of die proses heeltemal systap deur wapens onwettig te gebruik.”
TLU SA het intussen reeds na verteenwoordigende organisasies wat dieselfde uitkoms nastreef uitgereik om oor hierdie kwessies te vergader.
Uitgereik deur: TLU SA
Datum: 24 Mei 2021
Navrae: Mnr Henry Geldenhuys, President TLU SA,
Sel.: 083 560 1273
Mnr Bennie van Zyl, Hoofbestuurder TLU SA,
Sel.: 082 466 4470
