Die afgradering van die Landbank na rommelstatus deur die kredietgradeerder Moody’s Inverstors Service is maar net die begin van finansiële uitdagings wat die landboubedryf vanjaar verder gaan knou.
“Dit raak voortdurend moeiliker om ‘n positiewe gesindheid oor die toekoms van landbou in Suid-Afrika te hê,” sê mnr. Louis Meintjes, die president van TLU SA. “Nie net moet ons boere daagliks sukkel om kop bo water te hou met uitdagings soos plaasveiligheid, onredelike arbeidswette, veesiektes, droogte en beperkte uitvoergeleenthede as gevolg van swak ekonomiese toestande nie, maar nou word hulle nog verder in skuld gedompel deur ‘n afgradering van die Landbank wat vir die meerderheid boere krediet verskaf.”
Die Landbank word reeds sedert November 2019 dopgehou en is na die gradering een keep laer op Ba1, wat dit in rommelstatus plaas.
“Dit gaan nou duurder vir die Landbank word om besigheid te doen want die bank is afhanklik van fondse van elders om krediet aan kliënte te verskaf,” verduidelik mnr. Meintjes. “As gevolg van die afgradering sal die Landbank nou meer moet betaal vir die fondse wat sal lei tot ‘n verhoging in die rentekoers vir hulle kliënte.”
Volgens Moody’s is die gradering gedoen omdat hulle nie voorsien dat die regering in die toekoms genoeg speling sal hê om staatsentiteite te ondersteun nie. Die afgradering van die Landbank is net die begin van afgraderings van verskeie staatsentiteite en uiteindelik die land self.
Moody’s is die enigste kredietgradeerder wat Suid-Afrika nog nie na rommelstatus afgradeer het nie. Die volgende graderingsbesluit van Moody’s word in Maart geneem en ander kredietgradeerders soos Standard & Poor’s en Fitch Ratings sal waarskynlik na die begrotingsrede op 13 Februarie ‘n besluit neem oor verdere graderings.
“Vir TLU SA is dit ‘n verdere dolk in die hart dat die Landbank – wat in 1905 op die versoek van TLU SA gestig is – as gevolg van jarelange onbekwame bestuur en wanbesteding nie in sy mandaat kon slaag nie en waarskynlik verantwoordelik gaan wees vir die ondergang van verskeie boere.”
