Klik hier en maak 'n bydrae tot die TLU SA Traumafonds
Maak 'n bydrae tot TLU SA Traumafonds: Klik hier

TLU SA rig weereens die versoek dat die minister van polisie, Bheki Cele uit sy pos ontslaan word, aan die president en die portefeuljekomitee vir polisie.

Onder die falende bestuur van die polisieminister is meer as ‘n miljoen rondtes ammunisie tydens die afgelope week van onrus uit ‘n vraghouerperseel naby die Durbanse hawe gesteel, terwyl dit onder die polisie se toesig was. Cele ontken tot dusver dat dit onder die polisie se bewaking was.

“Uiteindelik maak dit nie saak onder wie se toesig dit was nie,” sê mnr. Henry Geldenhuys, die president van TLU SA. “Die patrone is gesteel en baie min daarvan kon al teruggevind word. As dit wel onder die toesig van die polisie gebeur het, wil ons baie dringend weet hoe dit gebeur het, wie betrokke was en hoe daar teen die skuldiges, en Cele opgetree gaan word.

“Iedergeval is ons steeds baie bekommerd oor waar die ammunisie gaan opduik en watter skade dit verder gaan veroorsaak.”

Die onderneming vir wie die patrone bestem was het gesê die polisie het gesloer om toestemming te gee dat die ammunisie die hawe mag verlaat. Die eienaar sê dat die vragte gewoonlik – hulle voer al vir 55 jaar ammunisie in – goedgekeur word om die hawe te verlaat en dan in Pretoria of Johannesburg geïnspekteer word. Maar hierdie keer het die owerhede aangedring dat die inspeksie in Durban gedoen word.

Dit strook met die bewering dat polisielede met kennis van die inhoud die inligting aan die diewe verskaf het. Die Valke ondersoek hierdie bewering.

Cele het ook gesê dat 10 000 patrone wat terselfdertyd uit ‘n ander vuurwapenwinkel in die Durban-omgewing gesteel is – terwyl hy self Durban was – teruggekry is, maar ander bronne meen dat dit deel van die gesteelde besending was.

Verder is die hantering van die onrus-situasie heeltemal onaanvaarbaar. Veral waar die polisie probeer verhoed het dat gemeenskappe hulleself beskerm, soos in Phoenix in KwaZulu-Natal.

“Ons keur dit nie goed dat die minister altyd ‘n flou verskoning het wanneer iets in sy departement verkeerd loop nie. Soms lieg hy sommer oop en bloot,” sê mnr. Geldenhuys. “Hoeveel keer gaan die regering dié optrede van iemand in sy posisie aanvaar, voordat hulle besef hy is nie opgewasse vir sy uiters belangrike taak nie?”

TLU SA se veldtog om Cele se kop te laat rol, is steeds aktief by hierdie skakel: https://www.tlu.co.za/tsamaea-cele/

 

Uitgereik deur:          TLU SA

Datum:                       19 Julie 2021

Navrae:                       Mnr Henry Geldenhuys, President TLU SA,

                                    Sel.: 083 560 1273

Mnr Bennie van Zyl, Hoofbestuurder TLU SA,

                                    Sel.: 082 466 4470

Sluit aan
POPI

Nuusbriewe
Checkboxes

Kontak Ons