Aan die hand van die nasionale verbod op die vervoer van vee – spesifiek beeste –wat nie oral toegepas word nie, maak TLU SA die voorstel dat boere wat sien hoe beeste vervoer word sonder die ingryping van die SAPD dadelik ’n saak teen die betrokke partye (wat die polisie insluit) maak wat nie die wet toepas nie.
Op 18 Augustus is die vervoer van vee opgeskort. Die nasionale verbod is in die Staatskoerant-kennisgewing 46741 verklaar. Ofskoon die verbod groot implikasies het, is dit volgens die Departement van Landbou noodsaaklik om die toenemende verspreiding van Bek-en-Klouseer te stop.
Mnr. Herman de Wet, TLU SA Streekvoorsitter: Natal, het opgemerk dat in KZN beeste nog vrylik vervoer word sonder enige ingryping.
“Ek het reeds meer as een vergadering met die polisie hier gehad en ek is geskok toe ek uitvind dat daar polisielede is wat nie weet van die verbod op die vervoer van beeste nie. Dit is eenvoudig onaanvaarbaar. Hoe kan die SAPD-lede nie weet van die verbod nie? Vir my kom dit neer op dwarsboming van die gereg,” sê mnr. De Wet.
KZN het tans 78 gevalle en die mees onlangse geval is op 29 Augustus aangemeld. Vrystaat en Gauteng het ook op dié datum nog gevalle aangemeld. Daar is tans in totaal 127 gevalle landwyd.
“Hier is hoe ek dit sien: Elke staatsamptenaar kry ’n salaris aan die einde van die maand. Vee-eienaars gaan nie aan die einde van die maand ’n salaris kry nie, want hy kan nie beeste verkoop nie. Daar is geen veilings nie. En ook geen algemene handel kan plaasvind nie. Lone gaan nie betaal kan word nie en dit beteken kos op die tafel is op die spel vir sommige boere. Meer as 200 000 opkomende boere gaan geen inkomste kry nie!”
Hiermee die dokument wat gebruik kan word vir die indien van klagtes.
