Na aanleiding van die vloede wat vroeër vanjaar grootskaalse skade berokken het langs verskeie riviere en veral die Vaal/Oranjerivierstelsel het TLU SA verskeie gesprekke met kundige mense en ook die verantwoordelike persone in die Departement van Waterwese gevoer oor die wyse hoe vloede hanteer word. Boere het selfs aangebied om in die Beheerkamer te gaan sit om saam te besluit oor die oopmaak van sluise al dan nie.
Die hele kwessie van vloedbestuur is nie ’n eenvoudige saak nie en verskeie aspekte word in berekening gebring om te kan besluit of ’n sluis oopgemaak word of nie. Om enkeles te noem is die beskerming van die dam seker een van die belangrikste faktore, daarna moet die stelsel so bestuur word dat daar ’n vol dam sal wees na afloop van die vloed. Die hele bestuur van die stelsels is gekompliseer met die dat die damme in die Vaal wel sluise het wat die vloei op ’n beperkte skaal kan reguleer, maar in die Oranje is daar nie beheer daaroor nie, m.a.w wat in moet uit as die dam vol is.
Die Beheerkamer het verskeie meetstasies in die verskillende stelsels wat wetenskaplik bepaal op watter stadium sluise oopgemaak moet word indien wel.
Daar sal geen bydrae gemaak kan word vir ’n boer om wel in die beheerkamer te kan gaan sit nie. Die departement het reeds begin om nou al so deursigtig en volledig moontlik inligting te versprei om boere en ander gebruikers so goed as moontlik in te lig, maar dan ook tydens ’n vloed so goed as moontlik en so vinnig as moontlik inligting beskikbaar te stel.
Die departement beplan om teen ongeveer einde September ’n inligtingsgeleentheid te hou waartydens ons lede ook sal kan inskakel waar boere so goed as moontlik ingelig sal word en ook die onderskeie wyses van kommunikasie beskikbaar gestel sal word. Boere sal tydens die geleentheid kans kry om onduidelikhede te kan uitklaar. Inligting oor die geleentheid sal beskikbaar gestel word sodra ons dit ontvang.
Foto: Wikipedia
