Dit gons tans by die plaaslike regering se munisipaliteite. Daar is ‘n geskarrel soos afkop hoenders, vir die wat hulle taak met erns opneem.
Liewe belastingbetaler, dra jy kennis waaroor die geskarrel gaan? Of gaan jy maar net met jou daaglikse take voort?
Ons wil van hierdie geleentheid gebruik maak om die belastingbetaler ‘n bietjie meer insig te gee oor die inpak op rekeninge vanaf 1 Julie 2021 ten opsigte van dienste sowel as eiendombelasting. Die munisipaliteite is tans besig met die Ontwikkelingsplan en begroting se publieke deelname proses. Die raad was reeds sedert einde verlede jaar besig met die dokument wat ongeveer 250 bladsye bevat om enige ontwikkeling binne die gebied te identifiseer, die fondse daarvoor te bewillig en voorsorg te tref dat daar voldoende inkomste is vir hierdie ontwikkeling. Dit is waar jy, liewe belastingbetaler, se beursie ‘n rol gaan speel.
Volgens die munisipale stelsels wetgewing is daar ‘n verpligting op die munisipaliteit se raad sowel as die gemeenskap. Die raad moet die plaaslike gemeenskap konsulteer oor die graad, kwaliteit en omvang van dienste wat verskaf word hetsy direk of deur ‘n diensteverskaffer. Die gemeenskap moet ‘n geleentheid gegun word om toegang tot hierdie dienste te verkry. Die gemeenskap se verpligting en regte is om deelname te geniet in die besluitnemingsproses van die munisipaliteit deur skriftelike of mondelingse insette te lewer. Die gemeenskap moet ook in kennis gestel word van enige besluit wat deur die raad geneem word wat hul regte, eiendom of enige regverdige verwagting mag beïnvloed.
Op 1 Julie 2021 tree die nuwe aanvaarde eiendombelasting en dienste se tariewe in werking. Indien die belastingbetaler dus inspraak hierop wil hê, is dit nou die tyd. Moet nie wag nie, reageer nou. Die raad moet die nuwe tariewe bekend maak met ‘n tydperk waarop daar geleentheid gegun word vir kommentaar en insette. Nasionale Tesourie het per MFMA omsendskrywe no 107 op 4 Desember 2020 reeds aangedui die voorspelling van die Verbruikersprys Indeks sal tussen 3 tot 6 persent wees en daarvolgens moet die munisipaliteit alle verhogings buite hierdie verband regverdig. U as belastingbetaler moet dus kennis neem dat u tariewe hetsy eiendombelasting of dienste, nie summier bo hierdie bandwydte verhoog word nie.
Verder word daar ook ‘n verpligting geplaas dat munisipaliteite die nuwe eiendomkategorie raamwerk implementeer nie later as 1 Julie 2021 nie. Dit beteken dat die nuwe belasbare eiendomkategorie raamwerk gebaseer is op die gebruik van die eiendom en geensins meer op die eienaarskap, geografiese ligging of enige ander basis nie.
Die inwoner moet onmiddellik die raad se resolusie ondersoek om kennis te neem van die verhoging in tariewe. As die resolusie aanvaar word met inagneming van konsultasie en u as inwoner het nie inspraak gehad daarop nie, word die tariewe geïmplementeer. Daar gaan geen ander roete wees om verder op te tree nie. Die inwoner moet ook in ag neem, daar is ‘n persentasie verhoging op die verhoogde bedrag elke jaar. As daar dan ‘n spesifieke jaar ‘n wesenlike verhoging deurglip, is die jare daarna, ‘n donker prentjie.
