Maak 'n bydrae tot TLU SA Traumafonds: Klik hier
Benutting en waarde van tyd Donderdag | 23 April | 2020

Met die roetines in huishoudings wat tydens die inperkingstyd op die een of ander manier ontwrig is, is dit nou die geleentheid om bietjie retrospeksie te hou oor ons dag tot dag bestaan.

Ons beleef dat mense noodwendig die waarde van familie en vriende (en ook werkskollegas) opnuut besef. Die besef dat die gevolge van die inperking besig is om in vele opsigte ons bestaansomgewing te herrangskik, laat mens ook bietjie terugkyk, maar gewis ook vorentoe.

Mens besin noodwendig oor hoe effektief elke minuut van die lewe regtig benut word. Was dit, gegewe elk se talente, in die verlede optimaal aangewend?

Belangrik egter is die toekoms. Tyd is een van ons grootste veranderlike bates wat benut moet word of dit is verlore. Moenie in die aand gaan slaap indien jy nie iewers iets bygeleer of daar nie ‘n positiewe verskil gemaak is nie.

Daardie verskil is nie net om suksesvol te wees in ons besighede nie – wat uiteraard ook noodsaaklik is – maar ook in ons verhoudings met mekaar, en meer nog met ons Skepper.  Mag elkeen die waarde van tyd opnuut besef in hierdie tyd en dit sodanig benut dat wanneer ons ons koppe eendag neerlê, daar gesê sal word: ‘Kyk daar het ‘n man (vrou) verbygegaan’.