Tydens vanjaar se besoeke aan die Jongboer van die Jaar-finaliste het die vraag: “Wanneer is ‘n boer suksesvol?” ter sprake gekom.
In antwoord moet ons beklemtoon dat boere noodwendig volhoubaar moet wees om te boer. Dit beteken dat die plaas winsgewend moet wees. Winsgewendheid behoort die hooffokus te wees, want daarsonder sal die markkragte se evalueringstaak inskop en die boerdery tot stilstand dwing.
Enige besigheidspersoon word deurlopend deur die markkragte getoets. Op ‘n plaas is die veranderlikes waarmee daar rekening gehou moet word, soveel meer omvangryk as in meeste ander besighede dat dit ‘n baie spesiale soort mens verg om wel sukses in boerdery te kan bereik.
‘n Persoon wat ‘n passie het vir dit wat gedoen moet word is reeds ver in die pad af op koers na sukses. Voeg daarby ‘n honger vir kennis, ‘n sin vir dringendheid, ‘n toekomsgerigtheid en die bereidheid om verantwoordelikheid te aanvaar en ons het die eienskappe wat nodig is om sukses te kan bereik. Die ingesteldheid van die individu speel dus ‘n baie groot rol. Uiteraard is daar verskeie ander eienskappe wat bepalend is vir sukses al dan nie.
‘n Vaste geloof as fondament verskaf die antwoorde in tye van onsekerheid, maar ook word die kultuuropdrag om te bewaak en te bewerk vir die toekoms daaruit geput.
Dit is die suksesvolle boere wat hul eie navorsing doen om in die eie unieke omstandighede deurlopend die beter keuses te kan bepaal. Die suksesvolle boer maak seker dat kennis oor dit waarmee daar geboer word optimaal verkry word. Indien daar slegs 10% kennis beskikbaar is sal die kwaliteit van besluitneming vassteek by 10%, maar die boer wat bv 90% kennis verkry, sal uiteraard ‘n baie beter besluit kan neem.
Die suksesvolle boer is daardie een wat die produksiefaktore bestuur tot by winsgewendheid. Die hoogste opbrengs gee nie noodwendig die beste wins nie. Dit kan maklik ingevolge die wet op dalende meeropbrengs beteken dat winste gemaak inderdaad benut moet word om die hoër opbrengste te finansier.
Groete,
Bennie
