Aanvanklik was alle bedryfsorganisasies, (die kommoditeitesorganisasies) as komitees op alle vlakke deel van die georganiseerde landboustrukture. Koöperasies was ook deel van hierdie strukture as ‘n besigheidsbeen (die Koöperatiewe- of Besigheidskamer). Met die tyd het die verskillende komitees binne georganiseerde landbou outonome organisasies geword, wat op hul eie begin funksioneer het.
Die destydse Suid-Afrikaanse Landbou-unie (SALU) het bestaan uit drie afdelings, naamlik die Provinsiale Kamer, die Bedryfskamer en die Besigheidskamer. Met die koms van die nuwe Suid-Afrika en grondwetwysigings by SALU, het voormalige Transvaalse Landbou-unie en SALU se paaie geskei. TLU SA het ‘n nasionale organisasie geword en het strukture gevestig regdeur die hele land. SALU het hul naam verander na AgriSA. Die Besigheidskamer staan vandag bekend as Agbiz.
Die bedryfsorganisasies is grootliks steeds deel van die Bedryfskamer by AgriSA terwyl van hulle ook by TLU SA geaffilieer is. Sommige organisasies verkies om eerder apart maar met goeie samewerking te funksioneer. Aartappel SA is ‘n goeie voorbeeld hiervan.
Vandag is elke bedryfsorganisasie ‘n organisasie in eie reg. Met die ontbondeling is ooreengekom dat die bedrywe sal fokus op hul spesifieke produk se navorsing, markontwikkeling, produkontwikkeling en phito-sanitêre maatreëls terwyl die algemene sake-organisasies soos TLU SA sal fokus op die beleidsomgewing wat aspekte soos veiligheid, watersake, grondsake, arbeid, plaaslike regering ensomeer insluit.
Wanneer ‘n boer ‘n probleem oor ‘n spesifieke kommoditeit het, moet dit deur die betrokke bedryfsorganisasie hanteer word. Hulle is outonoom en lede moet die koers en dinamika daar bepaal. Boere moet dus betrokke wees by ‘n algemene sake-organisasie (TLU SA), maar ook by die kommoditeite waarmee geboer word, se organisasies.
Bedryfsorganisasies word deur TLU SA as ‘n deel van die georganiseerde landbou-familie beskou. Die onderskeid tussen die algemene sake-organisasies soos TLU SA en die onderskeie bedryfsorganisasies is gesetel in die werkterreine wat vir elk gedefinieer is. TLU SA moedig sy lede aan om lid te word by die spesifieke bedryfsorganisasie wat diens lewer in sy spesifieke boerderyvertakking.
Die belangrikheid van die bedrywe lê grootliks daarin dat hulle fokus op die nodige produkontwikkeling, bemarking en navorsing terwyl die algemene sake-aspekte soos arbeid, veiligheid, eiendomsregkwessies, watersake, energie, AgriSEB, ens. deur TLU SA hanteer word. Hierdie werksafbakening is belangrik om te verhoed dat daar nie enige misverstande ontstaan nie. TLU SA respekteer elke bedryf in sy outonomiteit.
Die benadering wat TLU SA volg ten opsigte van die bedrywe behels dat hulle versoek word om te affilieer as ‘n spesiale kategorie-lid. Dit behels dat hulle volwaardige sitting in die Algemene Raad sowel as by die Kongres sal hê. Die onderskeie bedryfsorganisasies sal sodoende toegang hê tot inligting van TLU SA wat aangewend kan word om beter keuses te maak in beste belang van landbou.
Die onderskeie bedrywe spesialiseer op ander sake as landboubeleidsake en moet waak daarteen om hulself so te posisioneer dat hul deur hul optrede in die praktyk, maar ook deur implikasie, landbou-politieke keuses maak.
