Gemeenskap Sukses: Waar pas ek in?
Daar is een ding wat soos ‘n paal bo water uit staan: Niks gebeur vanself nie, veral nie in gemeenskappe nie. Daar is gewoonlik ‘n enkele gewilliger wat op alle terreine gesien word vir dit wat hulle vir hul gemeenskap doen.
Wat het geword van die eens trotse gemeenskapsdiens waar die gemeenskaplike doel groter gestel is as die individuele doelwitte? Ons weet tog dat ons gesamentlike pogings vir ons elkeen ‘n beter toekoms kan skep as elkeen sy kant bring.
Dit is die gesamentlike krag en die aanwending van so veel as moontlik talente van ‘n gemeenskap wat grootliks bepaal watter sinergie bewerkstellig word wat die beste moontlike uitkoms vir almal inhou. ‘n Brose gemeenskapspoging word ervaar indien slegs enkele persone telkens hul gewig ingooi terwyl die ander rugry en sleg praat.
Gemeenskapsdiens is nie ‘n saak waar elke individu vra wat hulle daaruit gaan kry nie, maar waar daar gevra word wat ons as gemeenskap kollektief daaruit gaan kry. Dit is wanneer die gesamentlike wringkrag 1+1=3 beteken. Met die verval van die staatsondersteunende instellings het dit inderdaad ‘n noodsaaklikheid geword dat gemeenskappe self ‘n toekoms sal moet skep.
Deur die volle uitlewing van ons kultuuropdrag kom die individu by die punt waar daar groter doelwitte as net jyself nagestreef word. Dit is dan wanneer daar besef word dat net jyself die een is wat die werklike verskil kan maak. Kom ons skep daardie toekoms ook in gemeenskapsverband, die toekoms waar ons eerder persone moet weg wys aangesien ons te veel hulp het as wat ons geleenthede laat skipbreuk lei omdat daar nie betrokkenheid is nie.
Groete
Bennie
Foto: Pixabay
