Klik hier en maak 'n bydrae tot die TLU SA Traumafonds
Maak 'n bydrae tot TLU SA Traumafonds: Klik hier
Die draai van die seisoen Dinsdag | 25 Mei | 2021

Ons is in die landbou-omgewing bekend met die draai van seisoene en die wete dat dit deel van die Skeppingsplan is om in die natuur geleentheid te gee vir produksie en ook rus.

In die Woord word daar op so baie plekke die voorbeeld van die landbouer gebruik om ‘n boodskap oor te dra. In die gelykenisse kan ons bv. dink aan die gelykenis van die saaier en van die afgedwaalde skaap. Ons leer van Nabot se wingerd en verskeie plekke van die voorsiening van voedsel. Ons kultuuropdrag is in Gen 1:28 en 2:15 waar ons die opdrag kry om te heers oor die natuur, maar baie belangrik om ook te bewerk en te bewaak.

Die feit dat ons as rentmeesters optree, bring juis ‘n besonderse verantwoordelikheid vir elk van ons na vore. Vir baie boere het die draai van die seisoen dalk op so wyse gekom dat dit negatief inspeel op volhoubare produksie. Vir ander was die seisoene in aanloop na die tyd om die opbrengs te kan invorder, goed en hoor ons van goeie oeste.

Ons ervaar in sekere dele van die land omstandighede wat oor ‘n tydperk die produksieproses negatief beïnvloed het teenoor dit wat al die jare die norm was. Die seisoene het daar nie goed gedraai nie.

Ons boere kan tot op ‘n punt klimatologiese krisisse hanteer en planne maak, maar daarna raak dit onbestuurbaar. Hierdie omstandighede dwing boere om aan te pas en met beter planne na vore te kom indien hulle wil oorleef. Dit is uiteraard makliker gesê as gedaan. Die praktyk vir elke plaas is uniek en verg ‘n eie keusemaking om daardie omstandighede te kan oorbrug.

Ons wil veral vir ons boere wat gebuk gaan onder omstandighede waar ons as mense nie noodwendig meer antwoorde voor het nie, baie sterkte toebid.

Mag julle seisoene ook weer vorentoe gunstig draai.

 

Groete, Bennie

Sluit aan

Nuusbriewe
Checkboxes

Kontak Ons