Artikel 7: Die versterking en bemagtiging van TLU SA is vir my ’n prioriteit. Ek sal daarna streef om tot voordeel van die landboubedryf en my medeboere TLU SA se goeie beeld te beskerm en uit te bou.
Die krag van TLU SA is in sy lede gesetel. Dit is elkeen se meelewing en insette wat maak dat daar kollektief planne gemaak kan word. Elke lid is ’n ambassadeur en die wyse hoe daar beginselvas en onwrikbaar standpunt ingeneem word, is bepalend van hoe ons as organisasie se profiel gaan lyk. Dit verg nie om ’n heethoof en net dwars te wees nie, maar om op te staan vir dit wat reg is. Dit is in die lewe belangrik om “vir” iets te wees en nie net “teen” iets nie. Daarom is dit belangrik dat ons strukture behoorlik moet funksioneer. Dit begin by elkeen self om net hul deel te bring – saam word ons dan ’n krag.
Artikel 8: Ek is trots daarop om as verskaffer van voedsel en vesel ’n bydrae tot die welstand van die totale bevolking en die land se ekonomie te lewer.
Die afgelope tyd van inperking rondom COVID-19 was dit duidelik dat die waarde van kommersiële landbou homself gevestig het as die grootste bate van die land. Sonder kos op die tafel sal die hele land tot stilstand kom en ophou funksioneer. Elke boer is ’n trotse draer van daardie naam wat as groep die grootste stabiliseerder in die land is.
