Klik hier en maak 'n bydrae tot die TLU SA Traumafonds
Maak 'n bydrae tot TLU SA Traumafonds: Klik hier
Noord Streek Nuus Woensdag | 30 September | 2020

Landbou toestande is in sekere gebiede baie swak met plekke wat vyf jaar gelede normale reënval gehad het. Meeste van ons lede het dit deur die winter gemaak en ons begin nou kort-kort opkyk in die rigting waar die reën moet kom.

In Noordstreek is ons landelike veiligheidstrukture so georganiseer dat ons sonder enige probleme kon oorskakel na die provinsiale polisie se bevelstruktuur wat die rigting van distrik munisipaliteite ingeslaan het. Arbeid onrus en gerugte daarvan is ook aan die orde van die dag, aangehits deur mense wat hulle voordoen as vakbond verteenwoordigers.

Plaaslike owerhede in Limpopo is soos die ander in Suid-Afrika, heeltemal bankrot. Dienslewering bestaan nie en die kleiner dorpe gaan daagliks agteruit. Die ANC-beheerde plaaslike owerhede begin om skielik brûe na landbou te bou, eerstens omdat landbou die enigste oorblywende stabiele werkgewer is en landbou ook gebruik kan word om plaaslike ekonomie te versterk.

 

Kongres

Namens die  bestuur en lede van die Noordstreek baie geluk aan mnre. Henry Geldenhuys en Wannie Scribante met hulle verkiesing as onderskeidelik president en adjunkpresident van TLU SA. Hulle word baie sterkte toegewens en wees verseker van ons steun met wat ook al ter wille van die uitbou van TLU SA beoog word. Dan sê ons ook vir die uitgaande president, mnr. Louis Meintjes, baie dankie vir sy leierskap die afgelope tien jaar, mag jou boerdery en sakebelange uitbrei en jy daarmee steeds sukses behaal.

Die moderne manier van kongres hou was binne die omstandighede goed. Bywoning in ons streek was besonder goed met en lede en nie- wat dit nooit op die tradisionele wyse kon bywoon nie, wat nou die geleentheid kon meemaak. Ons dank aan Lynne vir haar harde werk en al die ander by hoofkantoor wat julle uitstekend van julle taak gekwyt het met die nuwe manier van doen.

Geluk ook aan die wenners van kompetisies tot dusver, soos u weet, kom die res van die wenners in elk geval jaarliks uit die Noordstreek 😉.

Noordstreek hou sy reorganisasie AR op 1 Oktober 2020.

 

DLU nuus

Pietersburg DLU vier vanjaar hulle 100ste verjaardag en Izelle en haar span is hard besig met die organisasie van die viering. Indien u oor enige staaltjies of materiaal beskik wat sy kan gebruik kan julle dit direk vir haar stuur by 082 815 1639.

Soutpansberg DLU se voorsitter, Fanie Havenga, het die Vhembe Distrik se uitvoerende burgemeester onlangs ontmoet. Anders as om onnodig polities korrek te wees, maar (net-net) binne protokol, het Fanie dadelik wou weet oor dienslewering aan landbou en veral die opruim van vullis wat strome en riviere erg besoedel. Die munisipaliteit het kennis geneem en die volgende dag ’n trok met werkers uitgestuur. Politieke korrektheid het miskien sy plek in die parlement. By Soutpansberg DLU is “…laat die werk gebeur…” meer produktief as politieke korrektheid en …the way forward…

By die Ellisras DLU het Juanita Swanevelder na 18 jaar as DLU sekretaresse haar swanesang gesing en ’n nuwe beroep as boekhoudster by ’n bekende firma in Ellisras aanvaar. ‘n Waarnemende DLU sekretaresse help uit tot Ellisras hulle reorganisasie eersdaags sal afhandel.

Niemand sê iets oor Potgietersrus DLU nie, hulle praat self en by wyse van daad eerder as by wyse van woord. Hulle is ook maar ’n  beskeie  groepie mense, maar die plaasmoord optog sal nog lank onthou word. Elke lid van Potties DLU se lede was betrokke, op watter manier ook al. Dis al…. Tot in die buiteland!

Die Loskopvallei BU-gebied word erg geraak deur landelike misdaad omdat dit naby genoeg aan Gauteng is om oornag etlike bakkievragte lemoene en ander produkte te verloor. Die suide van die gebied, ook weens die nabyheid van etlike Midnight Fresh Produce and Meat afsetpunte, maak dat veediefstal steeds aan die toeneem is.

 

Eskom

Direk na Noordstreek se reorganisasie word ’n besoek aan die provinsiale Eskombestuur beplan met net een agenda item: die hoë en onnodige lynhuur koste.

Sluit aan

Nuusbriewe
Checkboxes

Kontak Ons