Ook die land se noordelikste provinsie word toenemend geteiken met prospekteringsaansoeke van instansies wat wil myn.
TLU SA se Noordstreek was instrumenteel daarin dat ’n prospekteringsaansoek in die Warmbad-omgewing teruggetrek het.
Net soos dit al die gewoonte van die Staat is om moeilike wetgewing oor Desember te promulgeer, het Samancor dieselfde gedoen toe hulle in die vakansietyd kennis gegee het dat hulle aansoek gedoen het om te prospekteer op die plaas Droogekloof, aangrensend tot die Mabalingwe Natuurreservaat. Belanghebbendes moes hulle belang verklaar baie vroeg in die nuwe jaar. TLU SA se Waterberg DLU, asook die Mabula Boerevereniging het hulle as belanghebbendes geregistreer.
Samancor wou soek vir chroom en platinum.
TLU SA se prokureur, Tiaan van Dyk, het waardevolle raad gegee wat gebruik is en uiteindelik het Samancor die aansoek teruggetrek.
Verskeie ander aansoeke is intussen op ander plekke geregistreer en dit is veral onbekende swart bemagtigingsmaatskappye wat probeer om die mynbedryf te betree. Dit sal, soos elders in die land, geweldige invloed op die landboubedryf hê, terwyl die Waterberg bewaringsgebied onherstelbaar beskadig sal word sou so ’n proses voortgaan.
