Die meeste boere in Noordwes is besig met die stroop van graan.
Sojabone is reeds 90% klaar gestroop met baie goeie opbrengste. Die prys is ook heelwat beter as verlede jaar. Die boere wat vanjaar sojabone in hierdie provinsie geplant het, is besonder geseënd.
Sonneblomlande is sowat 50% klaar gestroop, met gemengde opbrengste. Daar is gedeeltes met ʼn baie goeie opbrengs, maar sekere lande is erg besmet met sclerotina wat tot 75% van ʼn oes kan affekteer. Pryse vir sonneblomsaad is beter as verlede jaar.
Mielies is so drie tot vyf persent gestroop, met baie goeie opbrengste. Hier is die prys van wit- sowel as geelmielies swakker as verlede jaar, maar boere behoort hierdie jaar met die groter oes, beter af te wees.
Beesboere ondervind tans ʼn moeilike tyd. Die bek-en-klouseer uitbreking vroeër, sowel as COVID-19, het ʼn dramatiese verlagende effek op vleispryse. Speenkalfpryse het byvoorbeeld in net een maand met amper 30% gedaal.
Weiding toestande, sowel as die kondisie van vee is tans baie goed en boere vertrou dat veepryse mettertyd sal terugkeer na normaal.
Die diefstal van vee, landbouprodukte en nou ook landboutoerusting, is ʼn uitdaging vir enige boer en die bekamping daarvan bly ʼn groot uitgawe.
Die boere van die Noordwesprovinsie ondervind een van die beste landbouseisoene in jare en daarvoor dank ons die Hemelse Vader vir Sy genade en liefde.
