Die twee streeksvergaderings wat vanjaar reeds aangebied is, was van groot waarde vir die boere wat dit bygewoon het. Die volgende vergadering voor die Kongres in September is op 3 Augustus in Ermelo. TLU SA se Hoofbestuurder, Mnr. Bennie van Zyl en ander kenners oor landbou-aspekte sal as sprekers optree.
Oestyd
Boere in die streek is amper klaar gestroop en dit het oor die algemeen baie goed gegaan. Die beter oeste het agt tot nege ton per hektaar gelewer terwyl daar op plekke soos Greylingstad ‘n swakker opbrengs van twee tot drie ton geoes is. Dit word algemeen aanvaar dat die jaar se oeskattings optimisties was en dat die nasionale mielie-oes laer as 10 miljoen ton kan wees. Dit sal ongetwyfeld ekonomiese druk op die landbougemeenskap plaas.
Veldbrande
Dit is noodsaaklik dat boere op die Hoëveld veral in die wintermaande die maksimum voorsorg tref teen veldbrande en ook by brandverenigings aansluit. Veldbrande rig groot skade aan met boere wat winterweiding verloor en ‘n verlies aan bale ervaar as gevolg van brandstigting en sabotasie.
Veediefstal
Verskeie deurbrake is die afgelope maand gemaak met die inhegtenisname van sindikaatlede betrokke by veediefstal. Die verbetering van die verhouding met die polisie se veediefstal-eenhede het bygedra tot die sukses hiervan. Die streek werk hard om hierdie verhouding op goeie voet te hou, maar as gevolg van die swak ekonomiese toestande word daar nie voorsien dat die situasie vinnig gaan stabiliseer nie.
Veiligheid van roetes
Die veiligheidsituasie in die Oosstreek bly onstabiel en die lewering van mielies by silo’s is in gedrang. Dit is veral die stop en onderskep van swaarvoertuie wat die roetes wat deur boere gebruik word, onbegaanbaar maak. Volgens terugvoer word bestuurders uit voertuie gepluk om te bepaal of hulle buitelanders is. Frustrasie oor swak dienslewering lei ook daartoe dat voertuie aan die brand gesteek word.
Plaasveiligheid
Die polisie in die Ermelo-distrik het ‘n verskerpte veldtog om plaasveiligheid te bevorder van stapel gestuur. ‘n Polisielid is aan die omgewing toegewys en van ‘n voertuig voorsien om patrolleerwerk te doen. Die sigbare teenwoordigheid en beter kommunikasiekanale word goed ontvang. TLU SA se verwagting is dat die tipe aksie voortaan verder uitgebrei sal word.
Grondeise
Verskeie ou grondeise word weer die afgelope ruk bespreek. Dit is kommerwekkend dat ou sake – wat van 2006 en 2012 dateer – waarin die howe reeds uitsprake gelewer het, deur die departement geïgnoreer word. Daar is tot nou toe geen aanduiding dat summiere onteieningsbevele deur die departement uitgereik gaan word nie, hoewel die eise in opdrag van die minister so vinnig as moontlik afgehandel moet word. Dié situasie weerspieël die gebrek aan kapasiteit in die departement en kan nie aan die landbougemeenskap en TLU SA opponering van eise toegeskryf word nie. Beamptes is sterk ingestel op die mediasie van eise eerder as regsgedinge in die howe. Maar Adv. Rudolph du Plessis het dit tydens die vorige Kongres duidelik gestel dat ‘n onteieningskennisgewing of -proses wel ‘n regsproses sal wees en nie bloot ‘n dokument wat deur die minister uitgereik word, kan wees nie. ‘n Grondeienaar sal steeds so ‘n kennisgewing in ‘n hof kan teenstaan.
