Raak betrokke
As ons kyk na die misdaadsyfers wat verlede week deur die minister van polisie, Bheki Cele, bekend gemaak is, is dit duidelik misdaad in ons land is buite beheer. Die vorige 59 mense wat per dag vermoor word, het nou gestyg na 64 as ons werk op die polisie se statistiek van 5 760 moorde gedurende 1 April tot 30 Junie. Dit gaan waarskynlik in die volgende kwartaal styg wanneer die onlusstatistiek verwerk word.
Daarom is dit duidelik dat boere verseker baie meer betrokke sal moet raak by misdaadvoorkoming. Boere moet inskakel by plaaswagte en -strukture en moet voldoende opleiding ondergaan om nie net hulleself nie, maar ook hulle gemeenskappe te beskerm.
Verder moet alle misdaad gerapporteer word. Veediefstal word nie gerapporteer nie en daarom lyk dit nou volgens die polisie se statistiek asof daar ‘n daling in die voorkoms van hierdie misdaad is. Ons weet veediefstal ruk hande uit. Dit help nie ons sit met die probleem maar rapporteer dit nie, want dit trek die syfer heeltemal skeef.
Lede moet hulle paraatheid en veiligheid opskerp. Moenie uitgelok word en dan dom foute maak nie. Tree op as deel van ‘n struktuur.
As jy nou nog nie deel is van ‘n struktuur nie, wanneer gaan jy dan nou betrokke raak? Wanneer gaan jy deel word van jou plaaswag, jou boerevereniging?
Ek sê altyd – en ervaar dit self – dat net 10% van ons boeregemeenskap betrokke is by strukture, die plaaswag, die boerevereniging. Maar, die oorblywende 90% trek ook die voordeel van hierdie betrokkenheid. Die 10%-groep word egter al hoe meer kwesbaar en uitgebrand. Daarom is dit so belangrik dat alle boere by die strukture moet inskakel.
Ons is ook baie dankbaar teenoor dié SAPD-lede wat hard werk en probeer om ons boere by te staan en te beskerm.
Op ‘n ander noot… wens ons lede sterkte toe met die nuwe plantseisoen. Ons is bewus dat boere sukkel om kunsmis in die hande te kry. Die prys daarvan het ook die afgelope ruk uitermatig baie gestyg en is tot R2 000 per hektaar duurder as voorheen.
Daarom het TLU SA met verskeie kunsmisverskaffers onderhandel om vir ons lede afslag te bewerkstellig. Kyk gerus na hierdie bydrae oor een van die verskaffers. Kontak gerus vir TLU SA om uit te vind hoe jy afslag kan kry.
En laastens sien ons daarna uit om al ons lede en affiliasies tydens die jaarlikse kongres te sien. Op 1 September laat ons landbou leef!
Groete, Henry