Misdaad in Suid-Afrika is buite beheer. Die vlak van geweld en die wreedheid wat met die misdade gepaardgaan is skrikwekkend en onrusbarend.
Na aanleiding van die misdaad-statistiek wat onlangs bekend gemaak is, sien ons gemiddeld 69 moorde per dag in ons land.
Veediefstal wys afname, maar dit is omdat veeboere vertroue in die polisie en howe verloor het. Sake word eenvoudig nie meer aangemeld nie. Tans sit ons met 20% rapporteringsyfer! TLU SA doen ’n beroep op boere om wel asseblief diefstalle en misdaad in die algemeen aan te meld.
Sedert die ontmoeting in Parys om te vergader oor die landelike veiligheidstrategie was daar min tot geen vordering gewees nie. Realiteit is dat daar nie die nodige hulpbronne is om die plan behoorlik uit te voer nie. TLU SA het ’n verteenwoordiger op die komitee wat by die beraad gestig is. Ons sal deurentyd lede op hoogte hou soos daar verwikkelinge is.
Vir nou doen ek ’n beroep op boere om verantwoordelikheid vir hul eie veiligheid te aanvaar. Skakel in by jou plaaslike plaaswag en moet nooit ooit te trots wees om jou mede-boere vir hulp te vra nie. Aktiveer jou plaaswag wanneer nodig. Dit is uiterse geweld en marteling wat plaasaanvalle en -moorde gepaardgaan. Wees asseblief versigtig!
