Die nuwe plantseisoen het pas vir baie van ons lede afgeskop en lê nou voor vir ander. My wens is dat elkeen van ons lede ‘n voorspoedige plantseisoen sonder teëspoed sal beleef.
Hoë insetkostes speel ‘n groot rol, veral met dieselprys wat gereeld gestyg het. Ek hoop dat ons saaiboere genoeg reën sal kry en geseën sal wees met suksesvolle oeste. Daar is sprake van moontlike droogte in die najaar wat beteken lede moet voldoende navorsing doen en vroegtydig plant.
Plant met geloof, dit is slegs die Here wat hierdie oes vir ons kan deurdra. As mense is dit vir ons onmoontlik om die uitkoms te bepaal, en daarom is ons intens bewus van ons afhanklikheid van die Hemelse Vader.
TLU SA vra al ons geloofsvriende om saam te bid vir voorspoed en seën vir elke boer.
Planttyd is, soos elke jaar, weer ‘n gulde geleentheid vir diefstal van verskeie hulpbronne van chemikalieë, brandstof, kunsmis tot saad. En verder weer veral groenmielies wat onder diefstal deurloop. Boere moet hul eiendom en voorrade behoorlik beveilig om die verliese so laag as moontlik te hou.
Soos die einde van die jaar nader, is die aanhoudende aanvalle op ons boere en hul gesinne weer aan die toeneem. Ons beklemtoon weer die belangrikheid van betrokkenheid by u plaaslike gemeenskapstrukture en veiligheidsforums of -groepe, en om alles moontlik te doen om uself en u gesin op plase in Suid-Afrika te beveilig.
Van my kant af bedank ek elke boer vir sy bydrae om ‘n produk op die mark te sit vir die res van Suid-Afrika se mense.
Groete,
Henry
Foto: Sandie Clarke | Unsplash
