TLU SA het op 21 Julie 2023 samesprekings gevoer met die Landbank se voorsitter van die raad, Thabi Nkosi en die uitvoerende hoof, Themba Rikhotso oor die rol van die Landbank vir die toekoms en waar die kommersiële sektor in hul beplanning inpas.
Inleidend het TLU SA gemeld dat die markkragte die bepalende meganisme is wat enige besigheid, ook plase en die Landbank deurlopend evalueer vir sukses al dan nie. Dit beteken dat plase winsgewend moet wees en dat dit nie volhoubaar is indien boere byvoorbeeld herhalend geherkapitaliseer moet word nie.
Suid-Afrika benodig suksesvolle boere en dit sou meer suksesvol wees om met die regte mensemateriaal te werk wat die regte ingesteldheid het om wel ‘n boer te wees. ’n Boer is iemand wat ’n sin vir dringendheid het, verantwoordelikheid aanvaar, toekomsgerig en leergierig is, en beskik oor sekerlik die belangrikste eienskap: ’n passie om wel te wil boer.
Landbank het die versekering gegee dat hulle fokus is om die kommersiële sektor by te staan. Blanke kommersiële boere is tans ongeveer 70% van hulle boek. Hulle wil nie die swart deelname in landbou ten koste van die blanke komponent doen nie, maar wil wel die swart komponent in eie reg laat groei. Die belangrikheid van die regte keuse van boere is deur TLU SA beklemtoon.
Bestaande kliënte sal voorkeur kry om wel lenings vir grondaankope of produksiekrediet te kan kry. Nuwe aansoeke sal op meriete hanteer word en indien moontlik sal bystand verleen word.
Die ooreenkoms wat TLU SA ongeveer ’n jaar gelede met die Landbank gesluit het om boere wat nie hul verpligtinge kon nakom nie wel te help, indien daar ’n aanvaarbare besigheidsplan aangebied word, is opnuut bevestig. Verskeie voorbeelde van hoe sake so suksesvol hanteer is, is gemeld.
Die kommunikasie na die Landbank is oop vanaf ons hoofkantoor en indien daar enige algemene navrae is waarvoor daar duidelikheid verkry moet word is lede welkom om sodanige vrae deur te stuur na ons hoofkantoor vir die aandag van Mauritz Lombard by beleid@tlu.co.za.
