Die regering faal hopeloos daarin om Suid-Afrikaners teen misdaad te beskerm en selfbeveiliging is lankal nie meer ‘n luukse nie. Daarom is TLU SA besig om ondersoek in te stel na maniere hoe belastingbetalers voordeel kan trek uit noodsaaklike veiligheidsuitgawes. TLU SA het vandag ‘n veldtog bekend gestel wat mense aanmoedig om hierdie ondersoek te ondersteun.
“Die vlakke van misdaad het elke jaar sedert 2018 gestyg en in Desember 2022 die hoogste vlak ooit bereik,” sê Bennie van Zyl hoofbestuurder van TLU SA. “Met 75 moorde, 180 verkragtings, 63 huisrowe en 454 huisbrake per dag, is misdaad in die land inderdaad ‘n epidemie, selfs ‘n pandemie as mens die impak op oorsese familie in gedagte hou. Anders as met Covid-19, word dit nie amptelik as sulks beskryf nie. Die omvang van misdaad laat ons egter glo dat die rampbestuurwetgewing wat tydens Covid-19 vergunning gemaak het om op ‘n finansiële vergoeding vir sekere uitgawes aanspraak te maak, ook hier van toepassing moet wees.”
Met hierdie petisie wil ons solank steun werf sodat TLU SA, wanneer die beste moontlike roete vasgestel is, dit met oorweldigende openbare steun aan die relevante liggame en departemente kan voorlê.
“Soos met soveel van die regering se take, slaag die regering nie daarin om hulle mandaat na te kom nie. Mense is op hulleself aangewese om hulleself en hulle geliefdes te beskerm,” sê Van Zyl. “Dit is dan mos net vanselfsprekend en regverdig dat mens vergoeding ontvang, wanneer jy die regering se werk oorneem.
“Dit is veral ons lede – kommersiële boere – wat groot onkostes aangaan om te verseker dat hulle gemeenskappe veilig is. Elke sent wat op veiligheid spandeer word, is ‘n sent wat nie op produksie spandeer kan word nie en dit het ‘n impak op die volhoubare voorsiening van voedsel.”
Ondersteun TLU SA se veldtog by hierdie skakel: https://www.tlu.co.za/jou-veiligheid/
